Nicolette van der Walt. Hyperion

Hyperion

Sequoia sempervirens

 

Óók hierdie reus se oorsprong is minuskuul,

die vlug van saad uit die keël windaf

na waar varings en valleie sag

in die mis wag. Teen die slape van heuwels

kring die stam uit die kalligrafie

van sy wortels. ’n Buurtwag

van swamnetwerke spoor die boom

op die lang reis na die kroon aan –

selfs lig maak ruimte vir hom.

Die oppergod van die vertikales,

aartsvader en super fotosinteerder

slaap nie; hy konsentreer elke sening

op die opwaartste beweging van

voedingstowwe en reën –

die geduld van heiliges is eie aan hom.

Onaangeraak deur herfs

rig die rooihoutboom eeue

van suurstof en skadu teen die son op,

en in die holtes van ouhout, skuilte

aan gevlekte ooruile.

 

Ingeplaas in ’n laagte langs ’n kus skuil

die hoogste een teen die mens:

óók die stryd om bewaring is kolosaal.

 

 

© Nicolette van der Walt / 2016

Bookmark and Share

6 Kommentare op “Nicolette van der Walt. Hyperion”

  1. Lieflike, aktuele gedig, Nicolette!

  2. Nicolette van der Walt :

    Waardeer jou terugvoer, Daniël. Baie dankie!

  3. FRANCO COLIN :

    “fotosindeerder” eerder dalk “fotosinteerder” n.a.v. fotosintese. Aangrypend!!

  4. Nicolette van der Walt :

    Dankie, Franco. Dis inderdaad ‘n tikfout. Dankie vir die fynlees!

    {Webmeester het fout herstel! mj}

  5. Susan Smith :

    Wat ‘n wonderlike gedig, Nicolette!

  6. Nicolette van der Walt :

    Baie dankie, Susan!!