René Bohnen. Soogvisse in die Outeniqua

SOOGVISSE IN DIE OUTENIQUA

 

Jou sms blits deur die lug

soos ʼn groen gedig:

ʼn kalfie is gebore

in ons kobalt baai — kom

sit op die balkon by my

bokant die baardfyn

lugwortels van ʼn wildevy

 

Ja! teks ek terug, ja

dan drink ons malvatee en jasmyn

uit paisley porselein en vryf koel

los pêrels tussen wysvinger en duim,

praat oor ou vierpoot en voordiere

besin later oor glaukus uit die water

 

tik teen sonsak klik-klik

ryme vir die wilde grys dolfyne,

sonnette vir die suidkappers en ʼn diepsee

gedig vir die bultrug en bloue

wat roep

uit die matrys van ons bloedlyne

 

Ons skryf mekaar vas

aan die odes van die oseane

en ons gee die timpane, gee

aambeelde en die slakkehuisies van klank

aan die aandlug, aan die noem-noem

en die stil middernagwulke

 

want

ʼn waterboek is sy

mysteci, eubalaena;

ʼn biblioteek in die see,

sê die oues die fluisteraars en vertellers

wat geraamtes weer asem gee –

sy is ʼn drywende argief, sy is ons groepsgeheue

 

Laat my dan kuier in eden

wanneer die walvis lewe

sien in die waters van die lente

waar sy warmbloedig ʼn lyfballade is

 

Singend deur seisoene

roep sy

die ou herinneringe

roep sy

die skimme van ons beginne

 

Ons sing in soutwater agterna ; sy is ons ma

 

 

© René Bohnen Oktober 2013

 

Bookmark and Share

8 Kommentare op “René Bohnen. Soogvisse in die Outeniqua”

  1. charl-pierre :

    Rene, dis ‘n pragtige gedig.

  2. Marie Bredenkamp :

    “waar sy warmbloedig ‘n lyfballade is”. Sereen. Jy “skryf” die hele Eden “vas”.

  3. René Bohnen :

    Dankie Charl-Pierre!

  4. René Bohnen :

    Dankie Marie, my walvisbedwelming duur al ‘n leeftyd.

  5. Alice Hendriks-Boshoff :

    Iedere beeld vind resonans in my binneste, waar ek die betowering van walvisse en dolfyne bewaar.

  6. Rene Bohnen :

    Ek waardeer dit, Alice

  7. carina :

    Ek kry sommer hoendervleis!

  8. Uysie Alberts :

    Absoluut betowerend!