Nuuswekker. Die Jan H. Marais-prys: Nominasies sluit binnekort

images

Op 30 Mei 2015 het die trustees van Het Marais-fonds, wat ook een van die borge is van Versindaba, bekend gemaak dat hulle ‘n nuwe prys, die Jan H. Marais-prys met ingang 2016 instel. Hierdie prys, wat in vennootskap met Media24 en die Universiteit Stellenbosch aangebied word, het as oogmerk die erkenning van ‘n uitstaande bydrae tot Afrikaans as wetenskapstaal deur wetenskaplike werk en publikasies op hoë vlak en van uitmuntende gehalte in Afrikaans.

Die prysgeld beloop ‘n halfmiljoen rand.

In 2016 is die Jan H. Marais-prys aan prof. Hermann Giliomee toegeken .

Tans word nominasies ingewag vir die toekenning vanjaar. Volgens die Suid-Afrikaanse Akademie vir Wetenskap en Kuns se webtuiste sluit die nominasies op 25 Januarie 2017. Die oorhandiging sal op 30 Mei te Stellenbosch geskied.

Besoek die Akademie se webtuiste vir meer inligting.

Vir jou leesplesier volg ‘n gedig deur die nimlike Ronnie Belcher. Dié gedig het hy tydens in Bekgeveg in toentertydse Dorpstraat Teaterkafee gepleeg.

*

Poësie-aand

 

Sal ek vanaand in Dorpstraat se kafee

my siel ontbloot for everyone to see?

Hier tussen die geskinder en gepraat

my siel ophang soos aan ‘n doringdraad?

Met ander se geroggel en gerook

my sielsgeheim met nikotien bestook?

Hier tussen al die waaiers en die fans

myself beskinder saam met also-rans?

Nee, eerder lieg en skurwe rympies maak

oor snaakse goed wat ander siele raak

soos ghoffels wat kafoefel op ‘n trein

and other dear souls crying in the rain.

Maar smokkel met my siel se brood-en-jêm

voor al dié vreemde wesens? Not-a-dêm!

 

(c) Ronnie Belcher (uit: Van heidebos en klip, Suider-Kollege, 2000)

Bookmark and Share

Een Kommentaar op “Nuuswekker. Die Jan H. Marais-prys: Nominasies sluit binnekort”

  1. Breyten Breytenbach :

    ‘n Mooi en sterk gedig van Belcher.

    Maar hoekom sou ons die slenter van Skellumbos Joeniewersitie (om gesig te probeer koop nou hulle besig is om kaalgat handeviervoet te staan om beter op Afrikaans te kan skyt) ongesiens laat verbygaan?