Pirow Bekker. Apokalips van die parkiete

Apokalips van die parkiete

 

Ek is hier

en Ma is hier

en elke liewe maatjie –

ons sit en ginnegaap

hier in ons slaaptydbos

langs Bieblebom se paadjie.

 

Wat was dit? ’n Knal?

Weerlig uit die bloute, Ma?

En hou die hael verby?

Maar nee, ons fladder saam,

kry eindelik ons vlerke vry,

vlieg uit teen nog ’n knal,

sien hoe ons slaapmaats val.

 

Kom, Ma, kom ons draai om!

Ons moet terug, ons moet gaan vra:

Wat het jul oorgekom?

 

T’rug na die vervreemde lug,

die bos van ginnegaap:

Waar is hul heen, wat

slaan hul neer, hoe waai

die wind, hoe ruk, hoe skeur

dit ons geliedere oop?

 

Ek is hier

en Ma is hier.

Ons twee lê

in Bieblebom se paadjie

met rondom ons die ander algar

wat die dag se lig

uit hul oë aan ’t gaap is. Bedeesd

of hoe? “Kyyyk hierso, Ma!”

 

(c) Pirow Bekker / 2018

Bookmark and Share

Los kommentaar