Johann Lodewyk Marais. Rooi-ivoor

ROOI-IVOOR

Berchemia zeyheri

 

Rooi-ivoor, ek skryf by die lig

van ’n lampstaander uit jou hout

gekerf deur ’n kundige hand

en soek woorde om jou te ken.

 

Rooi-ivoor, ’n naakte byl het

jou gevel, tunstenversterkte

saagtande deur jou bas geklief

en ’n beitel jou afgerond.

 

Rooi-ivoor, ná die ritseling

van jou gekartelde blare

stil geword het, klink jou naam op

in die bloed van ivoordraers.

 

 

© JL Marais / 2018
Bookmark and Share

Een Kommentaar op “Johann Lodewyk Marais. Rooi-ivoor”

  1. HN :

    Prima, inderdaad!