PEN Afrikaans Jaarplan 2019

Beste lede en vriende van PEN Afrikaans

Jaarplan 2019

2019 is in volle vaart aan die gang en ons sien uit na ‘n produktiewe jaar in samewerking met ons lede.

Ons deel graag vanjaar ’n jaarplan met datums wat vir ons bedrywighede en hopelik vir ons lede relevant is. Dit sluit datums vir kunstefeeste, literêre feeste, skryfkompetisies en skryfkursusse in. Die jaarprogram kan hier afgelaai word.

Ons sal die jaarprogram opdateer soos nuwe datums en geleenthede bekend word en by volgende maande se nuusbriewe insluit.

 

Resensiekursus en slypskool by die US Woordfees

Die US Woordfees is om die draai en dit is vir PEN Afrikaans ’n plesier om betrokke te wees by twee kursusse op die feesprogram. Een is daarop gemik is om terug te ploeg in die boekjoernalistiek deur die opleiding van resensente, terwyl die ander daarop gemik is om jong skrywers te begeester en op te lei in die skryfkuns.

Op 2 Maart word die WOW-Skryfskool in samewerking met PEN Afrikaans en die ATKV-Skryfskool van die NWU aangebied. Tydens dié slypskool sal hoërskoolleerders en studente touwys gemaak word oor die fynere kuns van skryf. Die kursus is gratis, maar plek is beperk. Hierdie slypskool is vir aspirantskrywers ’n gulde geleentheid om onder leiding van Bernard Odendaal en Franci Greyling, kenners en gesoute aanbieders, die eerste stap in hul skryfloopbaan te neem. Meer inligting is hier beskikbaar.

Netwerk24 en NB-Uitgewers bied in samewerking met PEN Afrikaans op 9 Maart ’n resensiekursus by die Woordfees aan. Kerneels Breytenbach, Jo Prins en Anastasia de Vries sal kursusgangers met praktiese wenke en voorbeelde lei. ’n Nuwe roman uit NB-Uitgewers se stal sal met die oog op die kursus deur deelnemers geresenseer word. Sien hier vir meer inligting.

 

Die Wysigingswetsontwerp op Outeursreg: volgende stappe en ‘n simposium

Die Gekose Komitee oor Handel en Internasionale Betrekkinge beoog om hierdie maand oor die wysigingswetsontwerp te vergader, met insette van die Departement Handel en Nywerheid. Na verwagting sal belanghebbendes dan genooi word om kommentaar in te dien. Dit sal die laaste geleentheid wees om kommentaar te lewer voordat die wetsontwerp na die Nasionale Raad van Provinsies gaan vir goedkeuring. Ons sal ons lede op hoogte hou van verwikkelinge.

Op 19 Februarie bied ANFASA ‘n simposium aan oor die impak van die kopiereg-wysigingswetsontwerp op akademiese skryfwerk en die publikasie daarvan in Suid-Afrika.

Die sentrale vraag wat by die simposium gevra sal word, is wie by dié kopieregwysigings sal baat. Hierdie vraagstuk sal uit ’n verskeidenheid perspektiewe belig word.

Toegang is gratis, maar plek is beperk. RSVP om ‘n sitplek te bespreek. Sien volledige inligting onder.


Naas Steenkamp (1933 – 2018)

’n Geleentheid ter herdenking van die lewe van Naas Steenkamp, ’n stigterslid van PEN Afrikaans, is op 4 Februarie in Somerset-Wes gehou.

By dié geleentheid is Naas Steenkamp se sentrale rol in die totstandkoming van PEN Afrikaans onder andere belig. Ons is hom dankbaar vir sy reuse-aandeel in ons vestiging as PEN-sentrum. Sy nalatenskap is ryk en sy bydrae groot.

Lees hier meer.

 

’n Nuwe artikelreeks

In 2018 het PEN Afrikaans by kenners aangeklop oor regskwessies wat skrywers raak. Hul deelname en kundige insette het tot gevolg gehad dat ons maandeliks nuttige artikels met ons lede kon deel oor praktiese en wetlike sake wat hul raak. Kyk gerus na ons webportaal om die artikels na te gaan of soek op Facebook en Twitter met die hutsmerk #WatElkeSkrywerMoetWeet.

Hierdie jaar beplan ons ’n nuwe reeks artikels waarin skrywers self aan die woord is. Ons sien uit om te lees oor ’n verskeidenheid onderwerpe wat met die wêreld van die skrywer te doen het.

Die eerste skrywer aan die beurt is PEN Afrikaans-bestuurslid, bekroonde digter, resensent en nou ook romansier, Charl-Pierre Naudé.  Hy skryf hierdie maand oor die rol van netwerke en netwerkskepping in sy loopbaan as skrywer, en brei uit oor skrywersresidensieprogramme waaraan hy al deelgeneem het.

Hou gerus ons sosialemedia-platforms dop vir die artikel.

 

Spesiale aanbod: PharosAanlyn

Opbetaalde lede van PEN Afrikaans kry tot einde Maart 15%-korting by PharosAanlyn, Pharos se aanlyn versameling van algemene en vakwoordeboeke. PharosAanlyn is ’n omvattende naslaanbron vir elkeen wat effektief in Afrikaans, Engels en ander tale wil kommunikeer. Hierdie versameling sluit ’n wye verskeidenheid tegniese woordeboeke in en word deurlopend aangevul wanneer nuwe titels verskyn. Daar is tans meer as 30 woordeboeke in die versameling.

Daar is vir enkelgebruikers vier pakkette om van te kies.  Meer inligting oor die pakkette is hier beskikbaar en hier is ’n kort video wat illustreer hoe om PharosAanlyn te gebruik.

Fakture vir ledegeld, wat nie vanjaar verhoog sal word nie en dus steeds R300 beloop, sal binnekort uitgereik word. Lede wat hul ledefooi betaal het, kan by PharosAanlyn ’n koeponkode kry om teen dié afslag toegang tot ’n pakket van hul keuse te kry.

Ná vereffening van die faktuur, kan opbetaalde lede van PEN Afrikaans ’n e-pos stuur aan sales@pharosonline.co.za om ’n afslagkoepon te kry. Lidmaatskap moet bevestig word deur ’n kwitansie vir 2019-ledegeld by die e-pos aan te heg.

 

Maandelikse resensie-oorsig


Klik hier vir ons oorsig van Afrikaanse resensies wat in Januarie 2019 verskyn het en digitaal beskikbaar is. Hierdie oorsig sluit boekbesprekings, boekgesprekke en voorlesings in wat op die radio of TV uitgesaai is.

Indien jy weet van ander gerekende publikasies wat ook Afrikaanse resensies en boekgesprekke plaas en dit digitaal beskikbaar maak, laat weet asseblief na penafrikaans@gmail.com.

Ons wil graag elke maandelikse oorsig so volledig moontlik maak.

 

Nuwe Afrikaanse boeke in Januarie en Februarie 2019

Die stewige lys van nuwe Afrikaanse boeke wat in Januarie en Februarie verskyn het, voorspel goeie dinge vir ’n jaar vol boeke. Baie geluk aan al ons lede wat nuwe boeke op die rak het.

Die publikasielyste kan hier in Excel-formaat afgelaai word.

 

Vriendelike groete
Catrina Wessels
Bestuurder: PEN Afrikaans

 

PEN Afrikaans Bestuurder

Catrina Wessels

 

PEN Afrikaans Bestuur

Voorsitter: Marga Stoffer
Ondervoorsitter: Danie Marais
Tesourier: Naomi Bruwer

Ander bestuurslede:
Izak de Vries
Francis Galloway
Charl-Pierre Naudé
Bernard Odendaal
Andries Visagie
Fiona van Kerwel

Bookmark and Share

Comments are closed.