Zandra Bezuidenhout. Verjaardagborrel vir twee

Verjaardagborrel vir twee

.

Twee Afrikaanse literêre ramme,

Breyten en Ampie, om hul met permissie

op die kaalvoetnaam te noem,

tart op tagtig die kalender

en kaperjol tot ligdag

in ʼn Wellingtonse digtersjaart.

 

Hier langs die veranda by Grevilleas

bring bewonderaars en poëte

ʼn hand vol vere

en speld die hele dorp se lente

aan die bors van hul idole.

 

Nou, op die negende verdieping

van hul jare,

staan die verjaardagkêrels

windmaker nader

vir  ʼn ongedanste dans

in die paradyslike seisoen.

 

Uit die karaf van die kontrei

skink ons ʼn dubbeldop

en drink ʼn heildronk

op twee bekwame keldermeesters

van die Wamakersvallei.

 

Mag hul oë nog elke somer

aardebruin soos appelkoospit glans

en hul name aan die oewer klink

wanneer klippe in die winter

omrol in die Bergrivier.

 

© Zandra Bezuidenhout

September 2019

Bookmark and Share

3 Kommentare op “Zandra Bezuidenhout. Verjaardagborrel vir twee”

  1. Lekker loslit gedig! Dít het ek nou geniet. Dis ‘n baie paslike huldeblyk aan albei die kêrels. Hulle verdien dit 🙂

  2. Trienke Laurie :

    ‘n Hartlike gedig wat nog meer titels en digters betrek. Ons is trots op hulle.

  3. Zandra Bezuidenhout :

    Dankie vir die kommentaar, De Waal en Trienke.

Los kommentaar

 

*