Suid-Afrikaanse blogs

Biografiese inligting oor ons Suid-Afrikaanse Bloggers tans (Binneblik).

Sommiges lewer ook gereeld resensies

 

Kyk ook na inskrywings deur elke blogger op die Tuisblad waar die jongste blogs gelys word.

Gisela Ullyatt

 Gisela Ullyatt is ’n Vrystater in murg en been. Sy is gebore in Bloemfontein in 1977 en behaal die grade MA (Duits) en MA (Engelse taalstudie) aan die Universiteit van die Vrystaat. Haar PhD-navorsing (NWU) handel oor die Amerikaanse digter, Mary Oliver, gesien deur die raamwerk van Boeddhisme. Sy dig sedert haar hoërskooldae en in 1995 wen sy die De Kat/ATKV-poësieprys en in 1998 die Volksblad/Dept Afr/Nederlands-prys vir die beste gedig. Sy publiseer ook gedigte in Litera en Honderd Dichters 6. Sy en haar man, Tony, se eerste liefde is literêre vertaling en neem deel aan vertalingsprojekte soos In a Burning Sea (tans op Versindaba se webblad) en die SA Akademie vir Kuns en Wetenskap.

Wicus Luwes

Wicus Luwes het grootgeword in die Vrystaat en Noord-Kaap waar sy pa ʼn Wiskunde-onderwyser en sy ma ʼn laerskool-onderwyseres.. Hy matrikuleer in 1996 aan die Hoërskool Vaalrivier in Barkly-Wes (naby Kimberley) wat vir hom ʼn voorreg was om in ʼn klein dorp die  vryheid en veiligheid te ervaar wat daarmee gepaardgaan. Hy kwalifiseer as ʼn ingenieurs-tegnikus in Rekenaarstelsels by die Sentrale Universiteit van Tegnologie. Hy werk tans as ʼn tegnikus by Richardsbaai se hawe. Wicus is getroud met Tanya en het twee kleuter-seuns, Leon en Emil wat sy lewe vol maak. Lees Wicus se blog.
Louis Esterhuizen

Louis Esterhuizen

 

Louis Esterhuizen behaal ’n B.A. (Hons.) in Afrikaans aan die Universiteit van Suid-Afrika. Hy gee onderwys by verskeie skole en word later adjunkhoof van Pretoria Boys’ High School. In 1999 verhuis hy na die Kaap waar hy vakhoof vir Afrikaans by Rondebosch Boys’ High School word. Sedert Junie 2002 is hy bestuurder van Protea Boekwinkel op Stellenbosch. Esterhuizen debuteer met die bundel Stilstuipe in 1986, waarna nog 9 bundels volg. Sy agtste digbundel Wat die water onthou verskyn in 2010 by Protea Boekhuis en word bekroon met die Protea Poësieprys. Van sy verse is in verskeie bloemlesings opgeneem, te wete PoskaarteDie Afrikaanse Poësie in ’n 1000 en enkele gedigteGroot Verseboek, en Nuwe Verset. Hy was een van die stigters van Bekgevegte, ’n verbale “boksgeveg” waartydens twee spanne van drie digters elk teen mekaar meeding aan die hand van temas wat deur die gehoor gegee word. Esterhuizen is die inisieerder van die jaarlikse poësiefees Versindaba. Lees Louis se blog. Louis het voorheen gereeld ‘n Nuuswekker geplaas.

René Bohnen

René Bohnen

René Bohnen skryf en neem foto’s. Soms tree sy as fassiliteerder op by kreatiwiteits-werkswinkels of spanbougeleenthede.  Sy woon tans in Stilbaai, is ʼn Nataller van geboorte, het al in 13 dorpe en 5 provinsies gewoon en dalk is dit nog het einde niet. Sy behaal in 2009 die graad M.A. Kreatiewe Skryfkuns aan die Universiteit van Pretoria. Haar debuutdigbundel, Spoorsny verskyn in 2000 en in 2011 publiseer LAPA-Uitgewers haar tweede digbundel, in die niks al om. Sy voer gereeld onderhoude met digters.

Amanda Lourens

Amanda Lourens behaal haar DLitt aan die Universiteit van Pretoria met ‘n proefskrif oor die kanonisering van die vroulike outeur in die Afrikaanse literatuursisteem. Sy is tans dosent (Afrikaanse letterkunde en redigering) in die Departement Afrikaans en Nederlands aan die Universiteit Stellenbosch, en is ook verantwoordelik vir die koördinering van slypskole oor verskeie fasette van taalpraktyk wat deur die Departement aangebied word.  Sy is mede-outeur van Wetenskaplike skryfvaardighede [Scientific writing skills].  Lees Amanda se Blog.

Sy is een van Versindaba se gereelde resensente.

Heilna du Plooy

 

Heilna du Plooy het in Bronkhorstspruit en Alberton grootgeword.  Sy studeer aan die PU vir CHO en aan UP. Na haar huwelik met Andries du Plooy woon sy 6 jaar in Durban, 11 jaar in Pretoria en sedert 1986 in Potchefstroom waar sy tans professor in Afrikaanse en Nederlandse letterkunde  aan die Noordwes-Universiteit is.  Sy het ’n paar kortverhale in literêre tydskrifte gepubliseer asook ’n akademiese werk, Verhaalteorie in die twintigste eeu (Butterworth, 1986), en bydraes in verskeie versamelings van artikels en essays oor die Afrikaanse letterkunde. Sy het twee digbundels, naamlik  Die donker is nooit leeg nie (1997) en In die landskap ingelyf (2003) Heilna is een van Versindaba se resensente.
Dewald Koen is in Port Elizabeth gebore en woon tydens sy jeugjare in Pretoria en Kaapstad. Hy matrikuleer in 2002 aan die Hoërskool Andrew Rabie in Port Elizabeth. Hy studeer aan die Nelson Mandela-Universiteit en behaal die MA in Afrikaans/Nederlands onder leiding van prof. Marius Crous. Sy verhandeling fokus op die reispoësie van Joan Hambidge in Visums by verstek. Sy DLitt et Phil-studie aan die Fort Hare-Universiteit (2017-) fokus op ’n ekokritiese lees van Marlene van Niekerk se Kaar. Hy onderrig Afrikaans by verskeie Oos-Kaapse hoërskole en was tot en met Augustus 2016 Afrikaans-departementshoof aan Kingswood College in Makhanda (Grahamstad) waarna hy Afrikaans en Nederlandse letterkunde aan die Fort Hare-Universiteit se Oos-Londenkampus doseer. Sedert April 2019 is hy verbonde aan die Nelson Mandela-Universiteit se opvoedkundefakulteit waar hy Afrikaanse taal- en letterkunde doseer. Hy skryf gereeld resensies vir Afrikaanse dagblaaie, Litnet en Versindaba. Twee akademiese artikels is in Stilet gepubliseer en sy eerste kortverhaal “’n Nuwe begin” is in Die perfekte brander en ander verhale opgeneem. Dewald is ’n ywerige boekversamelaar; het ’n liefde vir tuinmaak en kyk graag films in sy vrye tyd. Dewald blog en skryf resensies vir Versindaba.

Marlies Taljard is in Pretoria gebore en getoë en het etlike jare op Rustenburg in Afrikaans en Duits onderrig gegee. Tans is sy verbonde aan die Noordwes-Universiteit se Potchefstroomkampus waar sy klasgee binne die Skool vir Tale. Sy behaal ‘n MA in Afrikaans-Nederlands met ‘n fokus op psigoanalise en kreatiewe skryfwerk en promoveer met ‘n proefskrif in Literêre Teorie soos toegepas op die poëtika van Antjie Krog. Sy is die outeur van verskeie artikels wat in vaktydskrifte verskyn het, ‘n Afrikaanse vertaling van Dostojevski se “Die droom van ‘n belaglike man” wat deur Frans van Rensburg bekend gemaak is in ‘n reeks solo-vertonings, asook mede-outeur van die Toets van Akademiese Geletterdheidsvlakke wat deur verskeie SA universiteite as plasingstoets gebruik word. Sy skryf gereeld resensies oor Afrikaanse literêre werke, dien as keurder van LAPA-boeke, is deel van die Afrikaanse Bybelvertalingspan, asook lid van die beoordelingspaneel wat verantwoordelik is vir die toekenning van die SA Literary Awards en redakteur van die tydskrif Woord en Daad. Lees Marlies se Blog.

Marlies doen gereeld resensies vir Versindaba.

Nini Bennett

Nini Bennett is in 1972 in Pretoria gebore. Sy behaal die MA-graad in Skeppende Skryfkuns (met lof) aan die Universiteit van Kaapstad (2001). In 2002 debuteer sy met ’n bundel kortverhale Stoornis, wat bekroon word met die UJ-debuutprys (voorheen die RAU-Mardéne Marais-prys). In 2008 wen sy die internasionale Room to Read-prys in die kategorie Afrikaans, en die jeugverhaal, Die storie van Vusi se orkes, sien die lig in elf amptelike landstale. In 2011 verskyn haar debuutdigbundel, Kodeks. Sy is tans besig met voorbereiding vir doktorale studie in ekokritiek, werksaam as skrywer en vryskut-resensent, en is ’n bekende digmentor. Haar derde bundel, Donkerwerk, verskyn by Naledi in 2019.

 

Bookmark and Share