annie klopper

Annie Klopper

Annie Klopper

Annie Klopper (Die Rockjagter) woon in Kaapstad. Sy is redakteur by Protea Boekhuis en is LitNet se musiekkorrespondent. Haar rubriek oor plaaslike musiek op LitNet, getiteld Rockjagter, het gelei tot haar gereelde insetsels op RSG onder dieselfde titel. Annie behaal ‘n B.A. in Geesteswetenskappe asook ‘n Honneurs (cum laude) en ‘n M.A. (cum laude) in Afrikaans en Nederlands aan die Universiteit van Stellenbosch. Annie was mede-navorser vir die MK-dokumentêr Johnny en die Maaiers, mede-samesteller van die 2007-heruitgawe van Eugene Marais se Die Siel van die mier (Protea), bydraer tot Van Volksmoeder tot Fokofpolisiekar (Sun Media) en van haar gedigte is opgeneem in Penseel 2007 (Universiteit van Stellenbosch), Versindaba 2008 (Protea) en Nuwe stemme 4 (Tafelberg).

 

 

 

oujaarsdag op Baardbos

 

in die omtrek van plusminus een dosyn hoenders

’n gebreklike stoepkoei, hartseer perdeoë, skedels, roes, dorings en

’n karavaan sonder wiele, baklei

twee honde met onpeilbare genetiese samestellings

op die stoep van die pub-grill-and-venue

waar rugby gekyk word,

troues en verjaarsdae gehou word en

’n antie met flappende onderarms beduie

dat die balp in ’ie toilets geblaas is

waar ’n hartseer handdoek slapper hang

as die mense by die bar

en ’n middeljarige man in sy broek pis

omdat hy nie sy pad na die krip

kan vind nie

en in sirkels sal slinger

tot hy hier sterf

 

© Annie Klopper. Nov. 2012

 

 

 

ingenieur

 

vanaand wil ek graag ’n ingenieur blameer

want in hulle siviele hoedanigheid

en obsessie met praktiese funksie,

tyd, geld en somme

onderskat hulle dikwels die ról van brûe

 

miskien, as ’n ingenieur destyds gedink het

aan die estetiese moontlikhede van ’n brug

miskien as brûe meer flambojant was

het ek gekies om vanaand bloot oor ’n brug

na jou te stap

 

eerder as om ’n storie oor ingenieurs

hier neer te krap

en mooi woorde te gebruik

om jou te probeer

bereik

 

© Annie Klopper. Mei 2010

 

 

strelitzia

 

dit was reeds te laat vir verskonings maak

toe mevrou Susan van Breda – enkele sekondes

nadat sy die oggend om stiptelik sewe-uur

met ’n lang sigaret

tussen gladde naels agter die stuur

van haar luukse sedan ingeskuif het –

skielik

geskok

na die linkerkant van haar simmetries

geplaveide siersteenoprit staar

 

dit was reeds te laat vir verskonings maak,

ja,

maar

dalk

indien sy nie so besig was om

(met die staar saam)

aan verskonings te dínk nie

sou sy dalk ten minste redes kon kop

waarom haar seun haar strelitzia

stukkend sou wou skop

 

© Annie Klopper. Maart 2010

  

 

’n Doos met rose op

 

in ’n stampvol trein se stampvol hoek

tussen Clocolan en Bloemfontein

staan ’n vrou met ’n doos

met rose op

(haar oë se blou is bruin)

 

haar waterige oë het glase oor

sy’s vuil en haar voete kaal

haar bruinpienk trui

het hare op

en haar rubbervel is vaal

 

die mense ken al die roosdoosvrou

tussen Clocolan en Bloemfontein –

in haar vuilpienk doos

met rose op

kriewel daar iets klein

 

uit ’n roospienk doos in ’n stampvol trein

wat ruk met ’n steenkoolsang

haal die vuilvoetvrou

’n katjie uit

en sy vryf dit teen haar wang

 

die mense wat kyk na die stinkvoetvrou

in die steenkoolstoom na Bloemfontein

sien ’n vaalpienk vrou

met ’n roosdooskat

en hulle harte word piepklein

 

gaan soek maar na die vuiltruivrou

tussen Clocolan en Bloemfontein –

in haar vuilpienk doos

met rose op

bêre sy jou pyn

 

Uit: Versindaba 2008, Marlise Joubert, [samesteller], Protea Boekhuis, 2008

Bookmark and Share