dolf van niekerk

Dolf van Niekerk

Dolf van Niekerk

Dolf van Niekerk is op Edenburg in die Vrystaat gebore, waar hy ook sy skoolloopbaan voltooi. Hy studeer aan verskeie universiteite en behaal in 1982 ’n doktorsgraad in Wysbegeerte aan die Universiteit van Pretoria. Hy begin sy loopbaan by die SAUK as omroeper/regisseur. Hy raak betrokke by die Departement van Landbou se radiodiens (Landbouradio) en word later Direkteur van die Departement se Inligtingsdiens, ’n pos wat hy tot sy aftrede in 1994 beklee.

Aanvanklik skryf Van Niekerk hoorspele en hoorbeelde vir die radio. Sy eerste gedigte verskyn in 1953 in Standpunte. Sy eerste prosawerk, Gannavlei, verskyn in 1958. Sy oeuvre bestryk al die genres: prosa, poësie en drama. Benewens toekennings vir sy radiowerk het Van Niekerk ook die Eugène Marais-prys, die Scheepersprys en die M.E.R.-prys ontvang. Die jongste van vier digbundels, Lang reis na Ithaka, het in 2009 by Protea Boekhuis verskyn.  

Luister na hierdie video-greep van ’n voorlesing uit Nag op ‘n kaal plein, deur Dolf van Niekerk [Protea Boekhuis, 2006]. Die opname is gemaak tydens Versindaba 2007.

 

 

Was dit sluiers

of membrane waardeur ek

na die lig moes beur;

of dalk ’n muur, ’n heg

van dorings, ’n DNS-struktuur;

of was dit mensehande met ’n tang

wat die spinsel in die moederskoot

moes breek? Want iets daarvan

skemer steeds deur die bestaan:

ruimtenood en onrus, verwondering

dat dood so digby lewe lê.

En nou dié liefde wat die bekende

onmag laat herleef, só verweef

dat ek nogmaals nie weet

maar soek na vorm, iewers om heen

te swem, te kruip – ’n luik wat open

na ’n dag se sekerheid.

Of moet ek leer dat tussen

mens en mens en man en vrou

die geheim in die gedaante

van versperrings lê: geprojekteerde

beeld, gewaande wese,

die spanning tussen gister en nou.

 

 

Uit: Versindaba 2007, Marlise Joubert [samesteller], Protea boekhuis, 2007     

 

 

 

 

 

 
 
 
 
 
 
 
 
 
 
 
 
 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Bookmark and Share