Eunice Basson

Eunice Basson

Eunice Basson is in Pretoria gebore en het aan die Universiteit van Pretoria en Unisa studeer. Sy is ’n kunshistorikus en voormalige dosent aan UP en die Departement Kunsgeskiedenis, Visuele Kunste en Musiekwetenskap aan Unisa. Haar navorsing is toegespits op die Suid-Afrikaanse beeldende en toegepaste kunste en sy het verskeie artikels oor die Suid-Afrikaanse Kunsgeskiedenis in vaktydskrifte gepubliseer. In 2003 verwerf sy ’n D.Litt-graad in Geskiedenis aan Unisa oor die politieke invloede op die skeppende werk van Erich Mayer. Sy was mede-redakteur van die kunshistoriese vaktydskrif, de arte wat deur Unisa gepubliseer word. In 2011 het sy die MA-graad in Kreatiewe Skryfkuns aan UP onder leiding van prof. Henning Pieterse cum laude voltooi. In 2009 het LAPA-Uitgewers ’n beurs vir Kreatiewe Skryfkuns aan haar toegeken. Van haar gedigte is in 1996 Die Tydskrif vir Letterkunde gepubliseer. Sy debuteer in 2014 met die bundel Leiboom.

 

 

Vroegoggend op straat

 

Vroegoggend se koerantplakkate

gaan aan haar verby;

sy dink aan die kooksel boontjies,

reg vir die aand se pluk;

Lucas wat die mandjie vashou,

die dom hand roerloos in sy skoot,

met bril en selfoon om die nek;

Lucas wat die in die groentetuin

steekvlieë en kewers afmaak

tussen voorvinger en duim;

 

sy dink hoe sy vandag sal stryk en stofsuig

om brood te win vir haar en Lucas,

in ’n rolstoel ná taxi-geweld;

getroos dat die versekering betaal vir paadjies

om hul huis, dat hy onder die bruinvy

en lukwartboom kan sit.

 

Wanneer hy vanaand haar hande

in sy slim hand toemaak,

vir haar en vir die wêreld bid,

is sy dankbaar vir die lewe

 

met ’n man en ’n kat  –

vir die vrede.

 

Uit: Leiboom, 2014, Queillerie



Bookmark and Share