Fransi Nieuwoudt

Fransi Nieuwoudt

Fransi Nieuwoudt

Fransi Nieuwoudt is in 1982 in Polokwane gebore. Sy verwerf Golden Key International Society-lidmaatskap (2002) en ’n honneurs-graad in Media Studies aan die Universiteit van die Vrystaat (2004). Fransi is ‘n simboliese kunstenaar. Sy neem reeds vanaf haar laerskooldae af (1993) deel aan en verower talle pryse by kunsuitstallings en kunsfeeste. In 2001 word sy as die wenner bekroon by ‘n Kovsies-digkompetisie en in 2005 ontvang sy ‘n toekenning vir spesiale bydrae by die Aasvoëlklub in Bloemfontein. Sedert 2009 verskyn van haar gedigte in verskeie versamelbundels. Sy debuteer in 2016 met die bundel ‘n vlerkslag van kleur by Cordis Trust Publikasies. Die omslagontwerp van die bundel is gebaseer op een van haar eie kunswerke. Sy het ook die kleurplate binne die bundel geskep. Woord en beeld is vir haar ineengestrengel en sy gebruik dit as ’n wederkerige spel. Sy woon saam met haar man, drie katte en ‘n hond.

 

my lewe as ´n pi

 

asblikke kan nie sing nie

stenografeer jy in 40hzs

‘n universum van betekenis

omskryf ‘n mikrokosmos

waar slegs

die wind deur openinge waai

 

Gaia het nie lief nie

in selfontbranding

 

is ek

die wit spikkel

die polsende aandwydte

 

ek is

die vrou wat in omwenteling

‘n boonste mantel omhels

 

simboliek blinddoek

‘n spesie wat reeds binne-

toe blik

my volmaanklippies reën nie

ysige lig

in ’n donker landskap nie

en die elemente is

nie ‘n vlerkslag van kleur nie

 

maar ek is ‘n digter     miskien ontlont

brandende kerse

‘n chemiese verandering

en smelt hitte was

sonder

die uitkruip van langstert-salamanders

voete wat wortelskiet

die drink van esdoringsap

die uitskink van ’n seepampoentjie

 

tog sien jy ook

 

‘n boom die groenbruin

drup van mos

in ons skilpad

 

 

(Uit: ‘n Vlerkslag van kleur. Cordis Trust, 2016)

 

 

Bookmark and Share