Jan de Bruyn

 

 

Jan de Bruyn
Jan de Bruyn

Jan de Bruyn is gebore op 25 November 1941 in die Moedersbond in Pretoria. Hy was onderskeidelik ’n klerk in die Staatsdiens, ’n onvanpaste netjies verpakte outsider-fenomeen in die privaatsektor, ’n meer van paste bruingebrande voorman op verskeie Rhodesiese plase; ’n boer op eie rekening en gevolglike insolvent in Suid-Afrika;  ’n akademikus aan verskeie universiteite en ’n sakeman op Louis Trichardt. Hy is in Mei 2007 oorlede nadat sy bydrae vir Versindaba reeds ontvang is.

Jan de Bruyn het die volgende digbundels gepubliseer: Vuurtent in die sneeu (1984);  Te bruin vir groen (1987) en Witvuurlig (2004).

 

 

Beethoven: Sonate no. 32

 

Klipbrokke

kras en singend

soos voetstappe nagte soos die wind in boomskeure

sing sy alleenheid

oor die seë

oor my Afrika

sy son dorings en klipeinders

tot hier waar die klavier soos bitter klokke

beier in die middag buite

in swart vure bome

nagte as die stiltes soos ’n man huil

 

want so kom hy terug

lei my deur nagte

oor elke grens van mense

lei hy my luister

die klokke se tonge skeur

 

teen stiltes

en mense

 

tot in die laaste

die klavier soos gelate bitter golwe breek

soos ’n mens se verbryselde geroep

lui die donker klokke

die alleenste stiltes in

 

stiller vér stiller

 

luister

 

sing die laaste klokke silwer

 

 

 

Gert Vlok Nel. Sonate vir kitaarstawe

 

Weer so half oor jou dorp gevlieg

nie kon weet of die skaduwee

sigbaar uit die lug is nie

 

gewens ek was eerder op ’n trein

sou vir jou kon waai

sou jou naam in die klikke-klak

gesê gehoor gehoorsê het

op stawe wat jou faam behoort te ken

op wiele wat jou songs vir my kon sing

 

vliegtuigmense is ek en jy mos nie

die landskap sukkel

om by ons uit te kom

sukkel om op te steier

tot teen die dun kokon

geen klip is van hier af sigbaar nie

ook mens en dier word heeltemal ontken

 

daar is geen land

so leeg en bruin geleë

daar is geen song

so stil of seer verkreë

 

en ek wens ek was op ’n trein

met Beautiful Beaufort-Wes se woorde

in die klikke-klak van die kitaarstawe

 

 

Uit: Versindaba 2006. Marlise Joubert (samesteller), Protea Boekhuis, 2006

Bookmark and Share