Johan Swarts
 Johan Swarts Johan Swarts is in 1985 in George gebore, maar verhuis kort daarna saam met sy ouers na Bellville. Na matriek verwerf hy die grade B.A. Taal en Kultuur en B.A. (Hons.) (Afrikaans en Nederlands) aan die Universiteit van Stellenbosch. Tans doen hy navorsing vir ’n M.A.-graad wat fokus op Afrikaanse blogs en is hy verbonde aan die Departement Afrikaans en Nederlands, waar hy tutoriaalklasse vir eerstejaars aanbied. Sy poësie verskyn sedert 2005 gereeld in die Stellenbosse studentebundel Penseel. In 2007 neem hy deel aan By se poësieprojek, DigBy. Hy is ’n onafhanklike filmvervaardiger, vryskutskrywer, ’n blogger en die inisieerder en redakteur van Die Tydskrif-projek.
|
spyt
vanaand is ek bly ons bly
nie in Darfoer nie
bly jou bene is vleis
sonder skrapnel (vlamloos
jou vel) jou lippe klam
ons torso’s wondloos en warm
ek is bly ons oortromme staan nog
mortiere fluit nie deur die voordeur
en kinderverkragters met tering
beleër die voorstoep nie
ons hardloop kamer toe en ek lag
ons vlug nie ons gly oor die lakens
jou rug is roetloos en ek raak oorstelp
die enigste landmyne is die hond s’n
vanaand is ek bly ons bly
nie in Darfoer nie
maar spyt
dat jou klere nog nie afgebrand het nie.
Uit: Versindaba 2008, Marlise Joubert [samesteller], Protea Boekhuis, 2008
