marius swart

Marius Swart

Marius Swart

Marius Swart:  Ek is ‘n kind van die Overberg wat op Bredasdorp gebore is en daar in die distrik my verstand gekry het. Daarna is ek Stellenbosch toe. Ek het in 2008 my Meestersgraad in Vertaling voltooi oor die vertaling van Afrikaanse romans in Engels. Van my gedigte het in 2006 en 2007 in die studentedigbundel Penseel, asook in die 2008-Versindababundel, verskyn. Deesdae werk ek by die departement Afrikaans en Nederlands aan die US. In my vrye tyd het my naastes vreeslik ergernis om my weg te hou van die plaas af, want dis waar dinge vir my begin en eindig.

 

 

 

 

Skipskop

 

klippers, skulpe

geroeste bottelproppe

kraak hier ondervoets

 

strandhuise

hul oë, littekens

en swart monde

halfbegrawe

in die harde grys veld

 

’n rondomtaliewasgoeddraad

geroes

op ’n lap kikoejoe

in ’n agterplaas

 

’n bietoubos gegord

in die plankvloer

van ’n klaskamer

 

duskant die skool die hawe

sy uitsleepplek

brokke gebreekte beton op die strand,

 

en ’n saal met ’n stoep

in die muurpleister ’n spinnerak

van ’n Saterdagaandsetees

 

en die naderende sand.

 

Uit: Versindaba 2008, Marlise Joubert [samesteller], Protea Boekhuis, 2008 

Bookmark and Share