marlise joubert
 Marlise Joubert Marlise Joubert is op Elim naby Levubu gebore. Sy voltooi haar skoolloopbaan op Warmbad (nou Bela Bela) in die Waterberge en verwerf ’n B.A. (Bibl.)- en Honneursgraad in Filosofie aan die Universiteit van Pretoria. Sy word bibliotekaresse by verskeie instansies. Na 16 jaar by die Departement Beeldende Kunste van die Universteit van Stellenbosch, werk sy vir vyf jaar in Protea Boekwinkel op Stellenbosch. In 1971 debuteer Joubert met die digbundel ’n Boot in die woestyn. Daarna volg nog vyf digbundels waarvan die jongste, passies en passasies, in 2007 by Protea Boekhuis verskyn het. Sy het drie romans gepubliseer, te wete Klipkus, Oranje Meraai en Ateljee van glas. Klipkus het in Nederlands verskyn as Rode granaat (1981). Sy skryf ook verskeie radiodramas en is reeds vier keer bekroon in die RSG/Sanlam-radiodramakompetisie.Sy skryf en skilder tans voltyds. Lees meer oor Marlise Joubert op haar webtuiste.
|
kommerkrale. ‘n gesprek
(vir H)
eens was alles vrugbaar
dawerend uitgedos in die land -
maar selfs hierdie nuwe sokkerstadion
om ‘n stad in haar kurwes op te hef
sal later aan flardes papier en plastiek verstik
en die wind uit die weste sal kringe stof
huilend in sy hart opjaag
want, vertel die vrou met haar hande soos engele
vasgedruk teen ‘n swamsiek eikeboom, Afrika
is nie beroemd daarvoor dat hy sy bates
koester óf bewaar nie
dit was eens alles ingestem op pouvere in die hoed
elke digter was ‘n kroonjuweel en sieners van die land
en, sê die vrou met haar arms om die moeë skof
van ‘n plaasdier, kon ons liewer na hulle
as na pastore of ministers luister –
ek verdiep my eerder in die woorde
van Blake en Rimbaud
sy stap deur haar vesting waar verwe magies fluister
haar ysterhond bly geseglik in sy hoek
haar gipskat lig hom nooit van die kussings op nie
die boeke buig dienswillig vorentoe
maar hoog in die stokkiesnes van ‘n gebreekte stad
broei die stadion soos ‘n silwer eier oop en blink
vermoed ons reeds die skare nuutgeborenes
en wat baat dit alles, dié miljarde, wat baat dit as ons wéét
more se berigte vertel die brutale verhaal van afgedopte
murasies waar maer honde elke voël en vlinder
uit die tuine jaag
dit was eens so mooi en uitgedos
knus onder gebergtes, behoue en versorg
dit was eens – ja, selfs die dorpies oral nou geraamtes
met senuwees van paaie middeldeur geknip
historiese huisies rug aan rug deurgesaag
en nou, vertel die vrou met kommerkrale in haar skoot
geklem teen naamlose omtes van haar dagboek,
nou het die kat die tuin as sy eie gemerk
en rol op sy rug terwyl hy luiweg na
gedroomde skoenlappers kap -
hy dink hy is ‘n leeu hier in die somerveld en son
‘n landskap wat al hoe kleiner sonder genade
al hoe nader in die wydtes strek
hy swalk hier rond met sy bosstert in die lug
soms verdwyn hy uur na uur om iewers uitgeput
uit ‘n watergat te kruip, stowwerig en wild vir kos –
dan bedink ek planne om hom permanent
die onderwêreld in te stuur
Afrika is tog bekend daarvoor, nie waar nie?
© M.Joubert. Jan.2010
waarskuwings
ek moet jou waarsku teen die wind wat roer
die wind wat die hare van gordyne roer
ek moet jou waarsku teen die strooisel vere
wat die tarentale op ons werf kom los
ek moet jou waarsku teen die molle wat sappige wortels
kom vreet die molle wat nikssiende rondhoer
in die tonnels van ambrosia o ek moet jou waarsku
teen die skulpe van sterre wat in bome kom hang
want hulle blink verniet
ek moet jou waarsku
teen die maan se mistige oog
die son se roomwang teen jou gesig
ek moet jou waarsku teen die lam met sy rug na ons gekeer
met sy gebreekte poot en wolkop na die stoof gedraai
ek moet jou waarsku
teen die lam wat sy ore flap in die waaier van lug
teen die honde wat straataf draf sketterend jag na asblikkos
teen die swart lappe van voëls op die wasgoeddraad
ek moet jou waarsku
teen my kissie van roospapier
waarin al my juwele is die krabbers die hangers
en die ringe van topaas
ek moet jou waarsku dat alles niks beteken vir die liefde nie
minder as woorde minder as water minder as brood
want die liefde het net oë vir mekaar
liefde is sonder bril in mekaar
liefde is oë vasgewaai inmekaar
liefde is sonder alles omheen
liefde is ’n dennewoud
liefde is ’n beurende dennewoud
waar die boskapper
onverpoos kap
ek moet jou waarsku
Uit: passies en passasies, Protea Boekhuis, 2007
