Pieter Fourie

Pieter Fourie

Pieter Johannes Fourie is gebore op 3 April 1940 in Philipolis. Hy word gevier as een van die veelsydigste en mees gesoute teatermakers in Afrikaans wat spog met meer as 50 jaar se betrokkenheid by die Suid-Afrikaanse teater- en mediabedryf.

Hy is ’n Hertzogpryswenner asook die mees bekroonde en gepubliseerde dramaturg in Afrikaans. Hy skryf onder meer Faan se Trein en Mooi Maria. Hy word op 77 die oudste debutant in die Afrikaanse poësie met sy debuutbundel Knapsekêrels (2017). Sy kwantumsprong van dramaturg tot digter is getrou aan die aard van Fourie se hele loopbaan. Die vestiging van die KKNK as eerste Uitvoerende Hoof is maar een voorbeeld. Hy ontvang ’n ere-doktorsgraad in dieselfde jaar (2011) as Desmond Tutu by die Universiteit van die Vrystaat.

Hy en sy vrou Maletta, ’n skilder, woon op Onrus.

 

kaap toe

 

leeftyd al werk ek

vir patat

soutsnoek en brood

 

jy baar

maak kinders groot

 

kaap toe

kaap toe

dit moet ons nog doen

 

nie hoorsê nie

ons eie

oumeidsoen

 

 

 

tafelberg

 

oupa

sit jou slaapmus op

of ouma

draai asynlap om haar kop

 

dalk ma

kraakskoon

op tafeldoeke

of selfs pa

soutwater vir swelvoete.

my arme ou ta

vrat na vrat

vreet aan jou tone

die moderne stad

 

tog

 

dit pla jou mooi bokkerol

dagin daguit gooi jy

jou skitterblink klimtol!

 

[Uit: Knapsekêrels, Pieter Fourie. Naledi, 2017]

Bookmark and Share