Ronelda Kamfer

Ronelda Kamfer

Ronelda Kamfer

Ronelda S. Kamfer is in 1981 in Kaapstad gebore. Sy bring haar grootwordjare in Blackheath en Grabouw deur. Sy matrikuleer in 1999 aan Eersterivier Sekondêre Skool. Sy was al verpleegster, kelner en administratiewe assistent by ’n bemarkingsmaatskappy.

Van haar gedigte verskyn in Nuwe Stemme 3, My ousie is ’n blom en Bunker Hill. Haar debuutbundel, Noudat slapende honde verskyn in 2008 by Kwela. Die bundel is 2009 bekroon met die Eugène Marais-prys. In 2011 verskyn haar tweede digbundel Grond/Santekraam.

 

 

 Musiek 

‘n prent-gedig deur Ronelda Kamfer. April 1010

die baas van die plaas

vir Mammie

 

ek het ’n ouma

wat net een taal praat

sy vertel my stories van baas Willem

en dr. Metzler

 

hoe goed baas Willem vir haar was

sy kon altyd eerste kies

watter ou klere sy wou hê

sy vertel van myle stap dorp toe

en hoe baas Willem haar voor

in die bakkie laat sit het

baas Willem het gesê haar kinders

hoef nie die standerd 10 te maak nie

hulle gaan mos op die plaas werk

en help met die kinders grootmaak

 

dr. Metzler het gesê

my ouma se kinders confuse hom

hulle’t ’n immorality in hul oë

hy sê my ouma kan dankie sê

die laaste een is doodgebore

 

daai een se naam

sou Judas gewees het

 

Uit: Versindaba 2008, Protea Boekhuis, 2008

 

 

 

 

 

Bookmark and Share