rosa smit

 

Rosa Smit

Rosa Smit

 

Rosa Smit is ’n onderwyseres in Drama en Spraakkunde. Sy gee ook opleiding in skilder.

In 2002 skryf Smit die drama Richmond en neem die regie daarvan waar vir die Kleinteater en Teaterhuisie.  Vir haar debuut, Krone van die narsing (1987), ontvang sy die Ingrid Jonker-prys.Van Smit se verseis in verskeie bundels opgeneem, onder andere Die braambos brand, Die mooiste liefdesgedigte in Afrikaans en ’n Honderd jaar later.

Haar tweede digbundel, Die begeleiding van duiwe, verskyn in 2008. ‘n Derde bundel, Die rooi veer in Vasco se hoed,  verskyn by Rosslyn Pers in 2013.

 

  

DIE DANSENDE CHRISTUS

Na ’n ikoon in die klooster “Rots van versoeking” in die Jordaanvallei

 

Klippe wou brood word

en jou pad wat strompelend

val en opstaan deur die erosiegeule

van die landskap,

waar wind vir veertig dae

in ander stemme praat,

het jou op ’n oggend tempelhoog gelei

en daarvandaan Jerusalem gewys,

maar jy het woorde soos krummels brood gestrooi

oor lig en water en elke ander deurlugtigheid

en toe rooigejurk, jou hemelblou mantel

argeloos oor jou bruin skouer oop geplooi

en soos ’n woestynbesie

hoog beginne raas

en dans,

knieë gebuig, gelig

gehuppel

en met elke sprong

versoeking triomfantelik

stof toe getrap.

 

Uit: Versindaba 2008, Marlise Joubert [samesteller], Protea Boekhuis, 2008

Bookmark and Share