Nuwe bundels

2018 & 2017 Publikasies

Ander digbundels in die jaartal:

2017,  2016  2015, 2014, 2013, 2012, 2011 & 2010

Indeks van Afrikaanse Poësiepublikasies: 2000 – 2012

‘n Volledige lys met publikasies, resensies, artikels, onderhoude en ook toepaslike opsommende tabelle. Kyk ook na ander  lyste op hierdie webtuiste.

Resensies en onderhoude oor nuutste digbundels verskyn gereeld.

 2018 Publikasies

/////

 

Tussen die abjekte en die eteriese: ’n Keur uit die poësie van Michel Houellebecq

Michel Houellebecq

Vertaal deur Henning Pieterse

Omslag

Michel Houellebecq, wie se poësie as melankolies, pynlik selfbewus en bytend satiries teenoor die lewe en die verbruikersamelewing beskryf kan word, is al die “Baudelaire van die supermark”, of “Baudelaire gekruis met Philip Larkin” genoem. Benewens die liriese en melancholiese aard van sy werk, is talle van die sy gedigte ook uiters kompleks weens die diep en ryk filosofies-teologiese en kosmologiese idees wat dit onderlê.

Ek het op die rivier gedobber

Naby die Italiaanse karnivore

In die oggend was die gras vars,

Ek het koers gekry na die goeie.

 

Die bloed van klein soogdiere

Is nodig vir balans,

Hul beendere en hul ingewande

Is die voorwaardes vir ’n vrye lewe.

 

’n Mens vind hul weer onder die gras,

Jy hoef net die oppervlak te krap

Die plantegroei is manjifiek,

Dis so kragtig soos die graf.

 

Ek het tussen die wolke gedryf

Absoluut desperaat

Tussen die hemel en die slagting,

Tussen die abjekte en die eteriese.

OOR DIE OUTEUR

Michel Houellebecq (gebore Michel Thomas), wat in 1956 op die Franse eiland Réunion gebore is, is ’n kontroversiële en veelbekroonde Franse romanskrywer en digter. Vir aanhangers herinner sy werk aan die tradisie van literêre provokasie soos gevind by Markies de Sade en Baudelaire terwyl kritici soms sy werk as aanstootlik en gemaak-skokkend afmaak. Hoewel Houellebecq sy grootste bekendheid (en berugtheid) met sy romans verwerf het, is dit in sy poësie waar die spanning tussen die verhewe (eteriese) en verwerplike (abjekte) ten diepste ondersoek word. Houellebecq is in 2010 met Frankryk se hoogste literêre toekenning, die Goncourt-prys, vereer vir sy roman La Carte et le Territoire (in Engels vertaal as The Map and the Territory).

OOR DIE VERTALER

Henning Pieterse was reeds as kind bekoor deur die verse en klanke van digters soos Thomas Elliot, Breyten Breytenbach en Lina Spies. Henning is vanaf die begin van 2016 professor in die Departement Afrikaans en Nederlands, Duits en Frans aan die Universiteit van die Vrystaat. Al behaal hy in 1994 ’n doktorsgraad in taalkunde, is dit veral kreatiewe skryfkuns wat hom na aan die hart lê. Hy debuteer in 1989 as digter met die bundel Alruin wat bekroon word met die Eugène Marais- en Ingrid Jonkerprys. Hy publiseer verskeie akademiese artikels en resensies oor aspekte van die linguistiek, letterkunde en kreatiewe skryfkuns, lewer referate by verskeie nasionale en internasionale kongresse en fasiliteer meer as 150 werkswinkels oor skryfkuns landswyd. Hy was voorheen ook direkteur van die Eenheid vir Kreatiewe Skryfkuns aan die Universiteit van Pretoria. Musiek is die ander groot liefde in sy lewe en hy het onder meer klavier en klarinet gespeel. Deesdae slaan hy tromme en speel ook die eiesoortige didjeridoe. Hy woon saam met sy lewensmaat, Karen Lazenby, en twee kinders in Bloemfontein.

[R295.00 (BTW ingesluit), Protea Boekhuis, 2018. ISBN (GEDRUKTE BOEK): 978-1-4853-0796-9, FORMAAT: 137 x 213 mm, Sagteband,  288 pp.]

 

weer-lig

Fransi Nieuwoudt

 

Omslag

Die Lichtenburgse kunstenaar en digter, Fransi Nieuwoudt, se nuutste bundel Weer-lig gaan binnekort die rakke tref. Hierdie metamodernistiese bundel is voorwaar besonders omdat dit ook van Nieuwoudt se eie kunswerke bevat. “Woord en beeld is interverweef,” sê sy. “Daarom is hierdie ‘n unieke en kunssinnige leeservaring.”

Die bundel spreek die positiewe sy van die transformasieproses in Suid-Afrika aan. Dit het ‘n sterk sintuiglike aanslag en oorspronklike beeldgebruik. Die titel sinspeel natuurlik op verskeie elemente van transformasie, soos onder andere die metaforiese blink toekoms wat Suid-Afrika inwag indien die betrokkenes die “ligte” sy van sake kan insien.  Dit spreek van hoop en versoening. Lig troef immers altyd die donker.

Nieuwoudt sê dat sy groot inspirasie uit Goethe se kleurteorie geput het. “Hy het nie donkerte gesien as die afwesigheid van lig nie. Lig en donker werk op mekaar in. Speel met mekaar en in daardie tussenspel verskyn kleur.”

Nieuwoudt is ook die skrywer van ‘n Vlerkslag van Kleur. Weer-lig word uitgegee deur Naledi en sal vanaf Mei beskikbaar wees by ww.naledi.online. (Naledi, 2018,  ISBN 978-1-928426-11-0)

.

 

Insektarium                           

Johann Lodewyk Marais

Omslag

Met hierdie bundel sluit Marais aan by sy bundels Aves wat uitsluitlik oor voëls gehandel het, Diorama wat die klem op diere laat val het en In die bloute wat op die see en seelewe gefokus het. Soos duidelik uit die titel blyk, skryf Marais hier oor insekte en ander klein lewensvorme soos virusse. Marais is bekend daarvoor dat sy gedigte respek het vir wetenskaplike kennis: Die wetenskaplike name van spesies word by die gedigte gegee, die feite moet korrek wees en die habitatte waarin die diere, plante en voëls voorkom, word versigtig uitgebeeld. Maar hy skryf ook oor die waarneming van insekte en die impak wat virusse en parasiete soos die Ebolavirus en die parasiet wat malaria veroorsaak.

Die bundel is dus nie net ’n “poëtiese” beskrywing van klein lewensvorme nie. Marais word nie verniet as Afrikaans se belangrikste ekodigter beskou nie: Dit gaan veral oor die samehang van lewensvorme en die mens in wie se hande die grootste verantwoordelikheid vir die oorlewing van spesies is. Ten slotte besin die digter ook oor sterflikheid en wat die indiwidu, in hierdie geval spesifiek die digter of “kultuurmens”, vir die aarde nalaat.

Dis ‘n bundel vir liefhebbers van natuurpoësie en die buitelewe,asook relevant vir omgewingsbewustes. Marais se gedigte laat die leser die kleiner lewensvorme rondom ons fyner waarneem en hul eienaardighede beter raaksien.

OOR DIE OUTEUR

Johann Lodewyk Marais is bekroon met die Ingrid Jonker-prys vir sy debuutbundel, Die somer is ’n dag oud en het die SALA-prys vir Diorama ontvang. Hy het reeds tien bundels gepubliseer en twee bundels omgewingspoësie saamgestel. Marais is bekend vir “groen” skryfwerk en vir sy navorsing oor Eugène N. Marais oor wie hy gereeld artikels skryf.

(Imprimatur, redaksie@imprimatur.co.za · 2018. ISBN: 978-0-620-77582-3, FORMAAT: 137 x 213, PRYS: R130, SAGTEBAND: AANTAL BLADSYE: 72.)

.

.

Vandag wil ek my blou skoene dra

Koos Kombuis

Omslag

Hierdie is Koos Kombuis se eerste gedrukte digbundel in meer as twintig jaar. Hy is van plan om enkele van die gedigte in hierdie bundel te toonset en dit dan, as promosie vir die bundel, te sing by die talle eenmanskonserte wat hy gedurig in Suid-Afrika doen.  Die bundel is lig en humoristies, met ʼn subtiele geestelike element. • Toeganklike poësie vir lesers in alle belangstellingsvelde.

Koos Kombuis is ’n bekende musikant asook skrywer van verskeie publikasies, onder andere ʼn outobiografie (Die tyd van kombi’s), rubriekbundels (Vêr in die wêreld, sushi) en digbundels (rock&roll.karoo).

Hy is ook ’n spotprenttekenaar vir onder andere Media 24. Daarby is hy ook die medestigter van ’n klere-reeks, “Kombuis Kat”. Sy skryfwerk en musiek is gewild onder mense van alle ouderdomsgroepe. Lees meer oor sy vorige bundels hier: https://af.wikipedia.org/wiki/Koos_Kombuis

(Naledi, 2018. R 175.00,  • 56 , 213mm x 137mm; ISBN: 978-1-928426-08-0)

.

huis vol kitare

.

eendag wil ek aftree

in ’n huis vol kitare

met ’n uitsig oor die see

waar die wind spoel

deur die snare

 

eendag wil ek koffie drink

op ’n veranda vol herfsblare

en deur ou digbundels blaai

terwyl ek ryp word

met die jare

 

eendag wil ek huis toe gaan

eendag

wil ek als verstaan

eendag

wil ek opstaan

uit my graf van woorde

en leë gebare

 

eendag wil ek wegkom

van die groot jillende

skare

 

eendag wil ek aftree

in ’n huis vol kitare

 

(Uit: Vandag wil ek my blou skoene dra. Koos Kombuis. 2018)

.

 

Bidsnoer

Pieter Fourie

Omslag

Hierdie is ʼn opvolg van die nou reeds onontbeerlike en uiters suksesvolle digbundel Knapsekêrels. Dit bevat toeganklike gedigte vir alle lesers. • Wye dekking in gedrukte sowel as digitale media.

Die skrywer is ’n Hertzogpryswenner, asook een van die mees bekroonde en bekendste dramaturge in Afrikaans. Benewens skrywer is hy ook ’n ervare akteur, regisseur en toneelorganiseerder. Hy ontvang sy ere-doktorsgraad in 2011 aan die Universiteit van die Vrystaat. Hierdie bundel word ywerig ingewag deur gewone lesers sowel as akademici.

(Naledi, 2018. Prys: R 175.00, Sagteband, 128 p • 213 mm x 137 mm;  ISBN: 978-1-928426-06-6)

.

.

 

wintervoetjies

die koue kruip

deur meiringspoort

seil klaarstroom verby

die swart kro in

 

die klogoed loop

bloeskoptoon

die kat die kwiep

 

’n druppel doutraan

verkluim verys

’n wit albaster hang

in huilboerboon

.

 

stad

(vir adam small)

.

beskaamd

vernederd

gekwes

in oop strook grond

 

oorleef

 

magteloos

gedwee

kerk

moskee

 

die ongeneesde wond

slagaar van distrik ses

 

 

(Uit: Bidsnoer. Pieter Fourie. 2018)

.

 

Openbare domein

Daniel Hugo

Omslag

Openbare domein is Daniel Hugo se vyftiende digbundel en is toeganklike gedigte vir gewone lesers en letterkundiges. Hugo geniet wye mediadekking as digter, vertaler, resensent, rubriekskrywer, radiovoorleser en openbare onderhoudvoerder. Hugo is een van Afrikaans se voorste en gewildste digters. Hugo het al meer as vyftig werke uit Nederlands in Afrikaans vertaal; dit sluit in romans, digbundels, asook kinder- en jeugboeke. Hy is in 2014 en 2017 deur die Suid-Afrikaanse Akademie vir Wetenskap en Kuns bekroon vir sy vertaling van onderskeidelik Tom Lanoye se Sprakeloos en Stefan Hertmans se Oorlog en Terpentyn.

Hugo het in 1987 sy doktorsgraad in die letterkunde aan die Universiteit van die Vrystaat ontvang vir sy ondersoek na die vernufsvers in Afrikaans. Na ʼn tydperk as lektor in Bloemfontein was hy twintig jaar lank radio-omroeper by RSG en daarna uitgewersredakteur by Protea Boekhuis. Deesdae is hy voltyds ’n vertaler en vryskut-taalpraktisyn. (Naledi, 2018. • R 175.00, Sagteband, • 114 p, 213mm x 137mm; ISBN: 978-1-928426-07-3)

.

.

Suidpunt

 

die wind waai noord – vanaf die stoep hoor ons

die arm buurt se geradbraakte brakke:

 

’n eindeloos godskryende geblaf

wat deur murg en been sny – ek verbeel my

 

ek hoor elke wurgketting wat ratel

en die fyn getjank wat uit dun kele

 

kom – slap Angelsaksiese sentiment,

maak ek my wys, en totaal onvanpas

 

hier waar ons suig aan brandsiek Afrika

se uitgeteerde, dorre tepellyf

 

(Uit: Openbare domein. Daniel Hugo, 2018.)

 

.

2017 Publikasies

.

Gesant van die Mispels

Marlene van Niekerk

Gesant van die mispels

Met dié bundel beeldgedigte stel Marlene van Niekerk op ’n oorspronklike en toeganklike manier die minder bekende Nederlandse skilder Adriaen Coorte (1658?-1707) bekend. Sy lewer daarmee nogeens ’n bewys van die vernuwende aard van haar werk.

Die gedigte verteenwoordig ’n fantasieryke ondersoek na die moontlike momente van skildersinspirasie, die tegniese aspekte van die skilderproses, en die artistieke opvattings en historiese konteks van die kunstenaar: Van Niekerk maak haarself en die kyker as ’t ware tot intieme toeskouers van dié twee skilders se stillewes. Uiteindelik verteenwoordig sowel die skilderye as die gedigte oomblikke van stille refleksie in roerige tye – die nederigste, kleinste objekte, soos wat hulle met toewyding verewig is deur Coorte en Mankes word in die gedigte versigtig herneem en insigtelik gemaak. Volgens wyle Henning Snyman is die bundels “’’n poëtiese én grammatikale kragtoer”, en ten slotte “’n ryke aanwins tot die Afrikaanse digkuns en kunsbeskouing”.

Marlene van Niekerk is ‘n internasionaal bekroonde digter en romansier. Haar eerste roman, Triomf, verskyn in 1995, en tien jaar later Agaat. Haar mees onlangse digbundel is Kaar, bekroon met die Hertzogprys vir poësie in 2014. Marlene is tans ’n professor in kreatiewe skryfkunde aan die Universiteit van Stellenbosch.  (Human & Rousseau, 2017. Prys : *R250, Bladsye : 68, Formaat : 250 mm x 160 mm,  Sagteband, ISBN-13 : 9780798176552)

 .

 .

In die stille agterkamer

Marlene van Niekerk

In die stille agterkamer

Met dié bundel beeldgedigte stel Marlene van Niekerk op ’n oorspronklike en toeganklike manier die minder bekende Nederlandse skilder Jan Mankes (1889-1920) bekend. Sy lewer daarmee nogeens ’n bewys van die vernuwende aard van haar werk.

Die gedigte verteenwoordig ’n fantasieryke ondersoek na die moontlike momente van skildersinspirasie, die tegniese aspekte van die skilderproses, en die artistieke opvattings en historiese konteks van die kunstenaar: Van Niekerk maak haarself en die kyker as ’t ware tot intieme toeskouers van dié twee skilders se stillewes. Uiteindelik verteenwoordig sowel die skilderye as die gedigte oomblikke van stille refleksie in roerige tye – die nederigste, kleinste objekte, soos wat hulle met toewyding verewig is deur Coorte en Mankes word in die gedigte versigtig herneem en insigtelik gemaak. Volgens wyle Henning Snyman is die bundels “’’n poëtiese én grammatikale kragtoer”, en ten slotte “’n ryke aanwins tot die Afrikaanse digkuns en kunsbeskouing”.

Marlene van Niekerk is ‘n internasionaal bekroonde digter en romansier. Haar eerste roman, Triomf, verskyn in 1995, en tien jaar later Agaat. Haar mees onlangse digbundel is Kaar, bekroon met die Hertzogprys vir poësie in 2014.Marlene is tans ’n professor in kreatiewe skryfkunde aan die Universiteit van Stellenbosch. (Human & Rousseau, 2017. Prys : *R250, Bladsye : 68, Formaat : 250 mm x 160 mm,  Sagteband, ISBN-13 : 9780798176545)

 

.

Die sin van die hut

Gilbert Gibson

Die sin van die hut

Weer eens ’n verrassende, andersoortige digbundel deur dié talentvolle  en bekroonde digter van die Vrystaat.  Gibson  is reeds bekend vir die wyse waarop hy taal ondermyn, selfs benadeel, en so nuwe betekenisse  herskep/ontdek.

Die bundel  bevat  baie liriese oomblikke tydens hierdie ontdekkingstog. Die hut bied net soos die taal beskerming, maar  die ‘ek’ wil ook daaruit  wegbreek en ontsnap.

Oor die skrywer: Gilbert Gibson  is in die Vrystaat  gebore en praktiseer as internis in Bloemfontein. Sy debuutbundel Boomplaats ontvang in 2006 die Protea-poësieprys. Hierop volg Kaplyn (2007),  Oogensiklopedie (2009),  vii ​(2013) en ​vry- (2015).  Vir lg. ontvang hy die Elisabeth Eybers-prys vir  poësie, die ATKV Woordveertjie vir poësie en ook ’n SALA-toekenning.

.

.

(drumpel)

Soos ’n wang oor ’n mond.
Neem jy stelling in teen die loopgrawe
van meubels wat oor die drumpel
bal en klou om later die res
van die huis met onrus te vul.
Buite blaf die honde jou
hande talm oor my hande.
Jou koel vingers die natuur van ’n leunstoel
wat uit die oorsprong
van kussings jou naels dof laat flikker.
In jou oë blink die vloer
en kalm dink ek dan kalm
geen onnodige roering roer

(Uit: Die sin van die hut, 2017)

(Human & Rousseau, 2017. Prys: R225; Bladsye : 80, Formaat : 234 mm x 152 mm, Sagteband. ISBN-13: 9780798176934 )

.

.

.

 

Aantekeninge teen die skemeruur

Clinton V. du Plessis

omslag

In hierdie bundel maak die ouerwordende digter aantekeninge teen die naderende skemeruur. Hy loop , deur sewe afdelings,  terug op die spoor van sy lewe en hierdie land, tree in gesprek met ander digters en worstel met die bagasie van taal en die onmag van woorde. (ISBN: 978-0-9946913-5-4, 210 mm x 148 mm; Sagteband, bladsye 145;  Cordis Trust Publikasies, 2017; Prys R200, posgeld ingesluit). Bestel vanaf : clintonvduplessis@gmail.com

 

Taalles 101

jy vergeet

die taal was in boipatong

(the place of hiding)

aan ’n stewel wat snags ’n deur

in sy moer kon skop

of koevoet

of in die loop van ’n pistool geknaldemper

op die tweede verdieping van ’n vermeende skuilhuis

in ’n buurland

met twee verdwaasde kinders

wat wees wonder

oor die stillewe

van hul ouers se bloedbedruipte lyke op die vloer

die taal het ’n balaklawa gedra

as die derde mag in die donker lokasies van teeninsurgensie

die sweterige hande met kapmesse in mynhostelle

het mombakkies aangesit die aangesig

askariswart gesmeer

handskoene

het die koverte vingerafdrukke van afsku verbloem

die taal was ’n fopmyn

’n briefbom fraai vermom

(Uit: Aantekeninge teen die skemeruur. Clinton du Plessis. 2017)

.

 

 

Vuurvas

Carel Anthonissen

Omslag

Die gedigte gaan oor die onskuld en verwagtinge van ‘n kind in sy eerste landskap, die ontnugtering en vervreemding wat die volwasse bestaan meebring, en die uiteindelike aanvaarding en omarming van pyn, siekte, ouderdom en dood. Vuurvas is nie alleen ‘n verwysing na die onvernietigbare kiem van hoop, regskapenheid en welwillendheid in die mens nie, maar dien ook as ‘n voorbeeld van aandagtige en gevoelige omgang met taal en verwoording.

.

Oor die skrywer:

Carel Athonissen het reeds enkele Engelse gedigte in ‘n reeks van drie bloemlesings (oor Afrika, oorlog en liefde ) gepubliseer. In 2015 is hy gelanglys vir die Sol Plaatje UE kompetisie. Een van sy gedigte is daarna opgeneem in The Sol Plaatje, European Union Poetry Anthology, Vol V. In 2016 is twee van sy Afrikaanse gedigte ook opgeneem in Stanzas Nommer 6, Desember 2016 ( R 190.00, Sagteband • 136 p, 213 mm x 137 mm; ISBN: 978-0-928316-97-1, Naledi, 2017)

 .

.

Intiem

 

om intiem te wees is om te onthou:

 

die stiller aanblik, die gloeiende mond

’n enkele wimper, één flitsende haar

 

en dat ons woorde met mekaar nooit

selfbewus of leeg was nie

 

maar altyd vrolik sonder swaar gordyne

of einder

die nagolf van ’n snaar wat onverwags

gepluk is

 

(Uit: Vuurvas, 2017)

.

.

 

Die goddelike komedie

Cas Vos (vert.)

Omslag

In hierdie bundel durf die skrywer Danté Alighieri se briljante werk aan. Hy bewys homself as uitmuntende vertaler.

Danté se lang reis kan tematies verbind word met Israel se uittog verhaal. Met sy La Divina Commedia beoog Danté om die boosheid van die mens aan die kaak te stel en roep hy die mens op om saam te werk aan die skepping van ’n beter samelewing van vrede en orde onder leiding van ’n goeie keiser en pous.

Oor die vertaler: Cas Vos was dekaan van die fakulteit Teologie van UP van 2000 tot 2010. Hy het die Andrew Murray Prys ontvang asook die Pieter van Drimmelen medal­je vir sy teologiese werk by die Akademie vir Kuns en Wetenskap. Hy het verskeie artikels in plaaslike en internasionale tydskrifte gepubliseer. Sy mees onlangse werk is sy bundel In ‘n oomblik (2016).

(R 175.00, Sagteband • 136 p, 213 mm x 137 mm , ISBN: 978-0-928316-85-8. Naledi, 2007)

Voorlesings:

Aleppo: https://youtu.be/2Qh1qD8K8PE

Die Goddelike Komedie: https://youtu.be/OOACiJb0avQ

.

 

.

Nuwe Stemme 6

Samestellers: Bibi Slippers en Charl-Pierre Naudé

Nuwe stemme 6

Nuwe stemme gee vir die varsste, nuutste stemme in Afrikaans ‘n plek om hulself te laat hoor. Die sukses van die projek kan gesien word in die vorige deelnemers wat nou gevestigde skrywers is: Ronelda Kamfer, Gilbert Gibson, Loftus Marais, Kirby van der Merwe en Tom Dreyer en vele meer. Hierdie uitgawe word saamgestel deur Charl-Pierre Naudè en Bibi Slippers. As jy wil weet hoe lyk die skrywers van die toekoms, lees Nuwe stemme 6. (Tafelberg, 2017. Prys : *R240, Bladsye : 176, Formaat : 198 mm x 130 mm, Sagteband, ISBN-13 : 9780624082644, Epub-ISBN : N/A)

Samestellers:

‘Hier is gedigte in die bundel wat nuut is op dieselfde manier as nuwe skoene. Die eerste dag is dit dalk ongemaklik en skaaf dit so bietjie, maar jou voete sal vinnig aanpas en die skoene intrap – en voor jy weet is dit jou nuwe gunstelingpaar.’ (BS) Bibi Slippers is ‘n digter en joernalis wat werk in die TV-bedryf. Haar debuutbundel Fotostaatmasjien is onder andere met die Eugène Maraisprys vir poësie bekroon.

‘Ek het gesoek na gedigte wat ‘n wesenlike kern van gevoel ofwaarneming of mymering gehad het: ‘n moment van gravitasie, selfs net ‘n vae vonk in die agterte iewers; en die digter dan meer bewus hiervan probeer maak. Van daar af vat hulle self die pad.Ek dink die digters wat hier bymekaar is, word binne bundelverb and elk herkenbaar aan ‘n “merk”. Digterlike uitinge maak “etekenispatrone”. Dink aan ‘n vingerafdruk, dit word ‘n identifikasie van die outeur daarvan.’ (CPN) Charl-Pierre Naudé is ’n bekroonde digter en ook bekend as prosaskrywer, boek- en filmresensent en rubriekskrywer.

.

.

Oop sirkel

De Waal Venter

Omslag

Oop sirkel deur De Waal Venter bevat opwindende gedigte met ongewone benaderings wat op mekaar inspeel in nie minder as agt afdelings nie. Dit sluit ook ‘n groepie prosagedigte in. Die titel “Oop sirkel” is gemotiveer deur verskeie aspekte van die gedigte in die bundel. ’n Hele paar gedigte het te doen met geboorte, groei en kindertyd. Dit is die begin van ’n lewensiklus waarvan verskillende stadia in ander gedigte beskryf word. En hierdie siklus of “kring” is “oop” in die sin dat die leser op enige punt daarvan toegang kan kry. ’n Sirkel het geen punt wat as “voor” of “agter” beskryf kan word nie. Enige punt op ’n sirkel het presies dieselfde status as enige ander punt.

In die gedig “Ontwyking van die voorskrifte van mens se ouers” word daar gepraat van hoe die ontstaan van die spreker in die gedig “beplan” word. Die gedig dui dus op ’n tyd nog voor die spreker gebore is.

 

“Oor die volgende ses dae

is daar heelwat modelle oorweeg,

almal vroom, sterk, slim en deugdelik;

op die sewende dag het hulle nie beplan nie –

dit was sabbat.”

 

Biografiese inligting:

De Waal Venter het benewens poësie, ook jeugboeke, kinderboeke, radiodramas, ’n film-draaiboek, kortverhale, verhoogstukke en TV-reekse geskryf, asook musiek-lirieke. Vorige publikasies: Kiem; Pols en Klawer (saam met DPM Botes en Menno Stenvert). Hy vertaal gereeld gedigte van o.a. die Nobelpryswenner Tomas Tranströmer uit Sweeds en van Pablo Neruda uit Spaans. Hy vind vertaling verrykend en bevrugtend vir sy eie werk. Hy is ook ‘n essayis wat maandeliks literêre essays op Versindaba plaas. Venter het ‘n wye belangstelling wat letterkunde, natuurkunde, sport, politiek, taalwetenskap en biologiese en ander vertakkinge van die wetenskap en tegnologie insluit. Venter het verskeie beroepe in sy lang loopbaan beoefen: joernalis, reklameskrywer, radio-aanbieder en stadsraadslid. Hy skryf tans voltyds en woon aan die Wes-Rand.  [Naledi, 2017. R 175.00 Sagteband • 112 p, ISBN: 978-0-928316-73-5]

.

.

 

Die mooiste Afrikaanse Christelike gedigte

Cas Vos (Samesteller)

Omslag

‘n Versamelbundel van die gewildste Christelike gedigte in Afrikaans, saamgestel deur Cas Vos. Dit bevat nie net geliefde gedigte uit die kanon nie, maar ook nuwe verse wat spesiaal vir dié bundel geskryf is. Die digters sluit in: Boerneef, D.J. Opperman, Elisabeth Eybers, Ingrid Jonker, Antjie Krog, Lina Spies, I.L. de Villiers, Joan Hambidge, Sheila Cussons, T.T. Cloete en Daniel Hugo.Die verse is baie toeganklik – ook perfek vir aanhaling vir menige geleenthede. ( Lux Verbi, 2017. Prys R280,    272 pp, 243 x 152 mm. Sagteband, ISBN-13 9780796320148)

Oor die Samesteller : Cas Vos was die Dekaan van die Fakulteit Teologie aan die Universiteit van Pretoria. In 1999 ontvang hy die Andrew Murray-prys en in 2001 word die Pieter van Drimmelen-medalje van die Akademie aan hom toegeken. In 1999 debuteer hy met Vuurtong. Intussen volg menige boeke, artikels, digbundels en vertalings van klassieke werke. Hy bly in Pretoria.

God die digter

daar is meer poësie in die sneeuvlokkie

as in die letterkunde en baie meer poësie
in die miskruier in die toktokkie
in die meteorologie en entomologie

in moremis en in die bergpiek

die horison wat in die hemel wegraak

in die rooswolk is daar baie meer liriek

die aarde is deur ’n digter gemaak

TT Cloete

.

.

Op die Vingerpunte van die Heelal

René Bohnen

Omslag

Hierdie poësie gaan oor verhoudings en patrone. Tussen mense, tussen mens en omgewing, tussen nommers en geloof. Dit is ʼn bundel oor broosheid, struktuur en verval.

Weerloosheid en weerbaarheid van mens en landskap word geteken, daar word gekyk na die kwesbare samehang van die geheel en na onregte op sosiale vlak. Die digter pak ʼn kronkelende reis aan na die onsekere tussenruimtes van bestaan.

Die verse verken bekende kunstenaars aan die hand van persoonlike belewenisse, (en andersom). Om die Ander te besoek is om die Self te begin ontsyfer.

.

Mensboom

(my bloed fluister name)

laas nag het wortels uit my lyf gespruit,

in skynlote oor ’n vleiland gekruip

ek was magies en hoog ’n haselboom –

my oë het vervloei en gestol tot murg van neut

tot roomkwaliteit en die pit van weet

ek groei voor die aangesig

van die oppergees van ’n gedig

ek is ’n haseldroom en ek is salm-oud

oor mý heers mercurius en die see

.

daarom swem visse en ’n god stroomop in my takke

daarom is die name silwer in my bloed

.

(Uit: Op die vingerpunte van die heelal, Naledi, 2017)

Biografie: René Bohnen debuteer in 2000 met die bundel Spoorsny en volg dit op met In die Niks Al Om in 2011.  Haar gedigte was ingesluit in verskeie bloemlesings soos Die Groot Verseboek in 2008 en Die heel mooiste Afrikaanse Liefdesgedigte in 2015. Haar gedigte was ook ingesluit in The Sol Plaatje European Union Poetry Anthology Volume VI. Sy geniet die vermenging van genres en verskeie van haar gedigte is getoonset, een so ’n gedig is nou voorgeskryf in die nasionale ATKV Koorkompetisie. (Naledi, 2017. R 175.00, Sagteband • 112 p, 213 mm x 137 mm . ISBN: 978-0-928316-95-7)

 

.

nou-hier

Corné Coetzee

nou-hier

Dié hoogs afgeronde digdebuut van Corné Coetzee is ’n opwindende gebeurtenis in die Afrikaanse uitgewersbedryf. Coetzee het ’n sonderlinge styl en toonaard. Op die oppervlak roer daar ‘n oënskynlike eenvoud, maar onderliggend is ’n web van deurdagtheid versteek. Volgens een keurder word die gedigte veral gekenmerk aan ’n fyn balans tussen emosie en mymering/waarneming – iets wat herinner aan sommige historiese digkunsvorme uit Japan en China. Coetzee put uit die wêreld van die huisvrou, die groei en verbrokkeling, vreugde en pyn van verhoudings, die Boeddha, die omgewing en die hier-en-nou soos gesetel in die durende gang van lewe en dood.

 

Hoogsomer

.

Wat sou ons gemaak het

as ons geweet het,

daardie volmaakte Februariemiddag,

dat die laaste vy ryp geword het

en die eerste blaar

sel vir sel sy skeidingslaag begin bou het?

’n Mens is tog geen vyeboom nie

’n Mens kon tog plan gemaak het

Biografie:  Corné Coetzee het in Pretoria grootgeword en in biblioteke gewerk voordat sy joernalis, teaterresensent en subredakteur geword het. Ná kinders het sy begin tydskrifartikels skryf oor veral die omgewing. Sy het in 2015 ’n MA (kreatiewe skryfkuns) by Tukkies voltooi. Sy woon saam met Hans Pienaar en een van hul dogters in Johannesburg.

(Human & Rousseau, 2017. Prys : R200, Bladsye : 64, Formaat : 234 mm x 152 mm,  Sagteband. ISBN-13 : 780798176200, Epub-ISBN : N/A Mobi-ISBN : N/A)

.

 

Krap uit die see

Fourie Botha

Omslag

Krap uit die see is die tweede bundel van die jong digter Fourie Botha. Soos sy debuutbundel Donkerkamer wat op die kortlys vir die 2013 Ingrid Jonkerprys was, sluit Krap uit die see aan by die debat oor manlikheid, wat sowel geweld, lyflikheid, die vaderfiguur, homo-erotiek en doodgewone huislikheid van twee mans wat saamwoon insluit. Die see is ’n deurlopende motief, die oerbron waaruit alle lewe kruip, in gedigte oor familieverhoudings, die liefde en erotiek. Grense tussen lewe en dood, droom en werklikheid, mens en dier vervloei op surrealistiese wyse.

OOR DIE OUTEUR:

Fourie Botha word groot in Bethal op die Hoëveld en op Nietverdiend in die Marico-Bosveld. Aan die Universiteit van Pretoria studeer hy Uitgewerswese en Engels en gee vir ’n paar jaar opvoedkundige boeke uit. In 2008 voltooi hy ’n meestersgraad in Engelse letterkunde en skryf daarna by die Universiteit van Kaapstad in vir ’n meestersgraad in Kreatiewe Skryfwerk onder Joan Hambidge. Tans is hy die uitgewer van plaaslike fiksie by Penguin Random House in Kaapstad. Sy gedigte word opgeneem in die versamelbundel “Nuwe stemme 4”, waarna hy debuteer met “Donkerkamer”, ’n bundel wat in 2013 vir die Ingrid Jonkerprys gekortlys is.

(Protea Boekhuis, 2017. PRYS: R160.00 (BTW ingesluit), ISBN:    978-1-4853-0757-0 (gedrukte boek), 978-1-4853-0758-7 (e-boek). 978-1-4853-0759-4 (ePub), FORMAAT: 213 x 137 mm, Sagteband, pp 64)

.

.

Radbraak

Jolyn Phillips

Omslag

Radbraak is Jolyn Phillips, kortverhaalskrywer van Tjieng tjang tjerries, se digdebuut in Afrikaans. In dié digbundel verbrokkel sy taal, draai sy die rug op haar vel-taal, pleeg sy ‘radbraak’ op haar eie taal.

Dit is die enigste medium wat sy het, maar sy breek dit, sy vernuwe dit, sy ‘ont’taal dit. Phillips is ’n nuwe stem in Afrikaans – by tye liries maar deurgaans skreiend en ook uitdagend.

Volgens die bekroonde digter Petra Müller is Radbraak ’n ‘klein aardbewing van ’n bundel. Hierdie skrywer het die engel in die klip beet.’

my ma in C-majeur

.

sy het net haar stem

wat uit haar hande sing

die nette stitch

do

re

mi

fa

never-ending

so

la

ti

do

sing sy uit haar hande

my ma laat my dink aan see-majeur

sonder sharps of flats

die maklikste die mooiste

omdat dit so skoon is

sy fluit die vis tot byt

haar vel gee ’n kernstemming op A vir die son

vir die golwe want haar seun fluit êrens

sy hoor sy do re mi fa woorde geskepe vir haar

[Human & Rousseau, 2017, Prys : *R180, Bladsye : 64. ; 234 mm x 152 mm, Sagteband, ISBN-13 : 9780798176163.]

 

.

.

Uittogboek                 
Johan Myburg

Omslag

Uittogboek – ’n bundel wat van fyn vakmanskap, tematiese en stilistiese verskeidenheid en intellektuele diepgang getuig – is ’n hoogtepunt in die digter Johan Myburg se oeuvre. Temas soos die doodsbesef, die mens se verganklikheid en die optekening van laaste dinge word op subtiele en sensitiewe wyse benader en met ironie en humor deurspek. Die samebindende gegewe van die bundel is die Romeinse keiser Hadrianus (76–138 n.C.), en die bundel open met sy bekende sterfgedig in Latyn en Myburg se trefsekere vertaling daarvan in Afrikaans. Myburg bewys homself met hierdie publikasie as ’n digter wat nie slegs formele verse nie, maar ook vrye verse en langer prosagedigte kan skryf wat die leser op verskeie vlakke uitdaag, gevange hou en betower.

 

OOR DIE OUTEUR

Binne die bestek van drie digbundels het Johan Myburg hom gevestig as een van die mees gerekende digters in die Afrikaanse digkuns; in hoofsaak omrede elke publikasie van hom van ʼn fyn vakmanskap getuig wat nie net sy eie nie, maar die totale digkuns verruim. Hy debuteer met Vlugskrif (1984). Sy volgende bundel, Kontrafak (1994) word met die Eugène Marais-prys bekroon. In 2008 verskyn die indrukwekkende Kamermusiek; ʼn bundel waar die kamer die sentrale ruimte is waarbinne handeling afspeel. Benewens digter is Myburg ook ’n joernalis en kunskritikus. Hy woon en werk in Johannesburg, het filosofie, sielkunde en teologie gestudeer en is tans besig met nagraadse studie in visuele kunste. (Protea Boekhuis, 2017. PRYS: R150.00,BTW  ingesluit,  ISBN: gedrukte boek: 978-1-4853-0776-1, e-boek: 978-1-4853-0777-8, ePub: 978-1-4853-0778-5, FORMAAT: 215 x 153 mm, Sagteband, Aantal bladsye: 100)

 

.

knapsekêrels

pieter fourie

 

Omslag

Die gedigte in hierdie debuutbundel handel onder meer oor ‘n byna uitgestorwe plattelandse lewe met tradisionele gebruike en ambagte. Tog word dit haarskerp en klokhelder verwoord sodat ook die moderne stadsmens aanklank daarby kan vind. Hy skryf ewe meevoerend oor die stad (Kaapstad) se leefruimte. Daar is ook aktuele gedigte oor Suid-Afrikaanse toestande, tydlose verse oor die dood en prikkelende, maar ook skreiende uitbeeldings van die liefde. Die verse het ‘n eie, unieke klank en styl. Die minimalistiese woordgebruik is besonder suggestieryk en skep dikwels meerduidighede – betekeniseggo’s wat naklinkend in die leser se kop bly draai. Die beelde en klanke klou inderdaad aan jou vas soos knapsekêrels.

Die skrywer is ’n Hertzogpryswenner asook die mees bekroonde en gepubliseerde dramaturg in Afrikaans. Hy skryf onder meer Faan se Trein en Mooi Maria .Hy word op 77 die oudste debutant in die Afrikaanse poësie. Sy kwantumsprong van dramaturg tot digter is getrou aan die aard van Fourie se hele loopbaan. Die vestiging van die KKNK as eerste Uitvoerende Hoof is maar een voorbeeld. Hy ontvang ’n ere-doktorsgraad in dieself­de jaar (2011) as Desmond Tutu by die Universiteit van die Vrystaat. Pieter Fourie is wyd bekend in die teater- en me­diawêreld in Suid-Afrika.

Die bundel kan bestel word op die webtuiste. www.naledi.online

(Naledi, 2017; Prys R 175.00, Sagteband • 128 p • 213 mm x 137 mm, ISBN: 978-0-928316-77-3)

.

.

’n ope brief aan Dorian Gray

Ruan Fourie   

‘n ope brief aan Dorian Gray

In hierdie debuutbundel word ’n liefdesgeskiedenis vertel soos dit deur verskillende stadiums beleef word deur die spreker. Aan die begin soek die spreker na ’n manier om sy liefde duidelik genoeg uit te druk; dan volg die ontnugtering en die belewenis van die geliefde as ’n leë dop, en uiteindelik volg die misnoegde ervaring van mislukking. Die hele bundel staan in gesprek met Oscar Wilde se roman, The picture of Dorian Gray, waarin die jong Dorian Gray wens dat sy afbeelding in ’n skildery sal verouder, terwyl hyself jonk bly. Die gedigte verwoord in hierdie bundel die aftakelingsproses en boots die narratief van die Wilde-roman implisiet na.  Soos in die roman word die grense tussen werklikheid, verbeelding en kuns in die gedigte dikwels oorskry. Die atmosfeer van verval van die Wilde-roman word ook in talle van die gedigte opgeroep. Die verwoording van die mislukking van ’n liefdesverhouding in die bundel behoort aanklank by jonger lesers te vind, terwyl die baie verwysings na kuns en letterkunde ’n intellektuele uitdaging vir die leser bied.

OOR DIE OUTEUR: Ruan Fourie is in 1994 in Bloemfontein gebore en is tans ’n honneursstudent aan die NWU. Van sy gedigte is op Versindaba gepubliseer en hy het ook as digter deelgeneem aan die Byderhand-projek by Aardklop 2015, wat die ATKV-Aartvarkprys vir Grensverskuiwende Werk gewen het.  (PRYS: R160.00 (BTW ingesluit); ISBN:  978-1-4853-0747-1 (gedrukte boek) 978-1-4853-0748-8 (e-boek) 978-1-4853-0749-5 (ePub); 137 x 213 mm; Sagteband , pp 72, Protea Boekhuis, 2017)

 

.

Voor ek my kom kry

Pirow Bekker

Omslag

Omslag

Die omslag van die bundel met sy abstrakte figure suggereer die gesprek wat in hierdie bundel gevoer word met die self, die geliefde, die lewe en die dood. Die digter ondersoek verskillende fasette van ’n lang en kreatiewe lewe.

In die eerste afdeling kom die verhouding met die aarde ter sprake; in die tweede afdeling die ambivalente verhouding met die land waarin hy gekies het om te bly woon, ten spyte van die ongenaakbaarheid van klimaat, plae en sosio-politieke kwessies. In die volgende afdelings kyk die digter op ironiese wyse na die dreigende dood wat hom in verskille gedaantes voordoen. Dan volg gedigte oor die liefde: vir die taal, die woord en vir die geliefde vrou.

Die fyn humor waarmee die digter na die ouderdom kyk, sorg dat die laaste gedigte nie neerdrukkend is nie, maar die lewe bly omhels, soos in “Hansie Slim herbesin”, waarin gespot word met die “mediese kernplan” waarmee voorsorg vir siekte en ouderdom getref word. En tog,

die hele infrastruktuur ten spyt

verlaat Hans sy huis, begeef hy hom

op ’n lukraak ryloopreis

die wyer wêreld in.

Daarom kan die digter in die slotgedig terugkyk op die verrassing van ’n lewe wat sonder beplanning of padkaart, sy eie verloop geneem het.

OOR DIE OUTEUR

Pirow Bekker is ’n veelsydige skrywer van romans, kortverhale en poësie. Sy vorige twee bundels, Van roes en amarant (2008) en Atlas teen die vergeetrivier, (2013) is goed ontvang deur die literêre kritiek.(Protea Boekhuis, 2017,  R180.00 (BTW ingesluit). ISBN:         978-1-4853- 0648-1 (gedrukte boek), 978-1-4853-0743-3 (e-boek): 137 x 213 mm: Sagteband, pp 108)

 

.

Alles het niet kom wôd

Nathan Trantraal

alles-het-niet-kom-wod_konsep

Omslag

’n Splinternuwe digbundel deur ’n gerekende en opspraakwekkende Kaapse digter. In Alles het niet kom wôd dig Nathan Trantraal oor die onderwerpe wat hy in Chokers en suvivors met sy kenmerkende energie en emosie belig het.

In sy tweede bundel dig Trantraal oor Afrikaans, oor klas, ras, en die politiek, maar neem nou ook seksualiteit, en die religieuse en stedelike milieu waarin hy grootgeword het, in oënskou. ’n Outobiografiese en kontroversiële bundel deur die wenner van die Ingrid Jonkerpys. (Kwela, 2017; ISBN: 9780795707919, Prys (insl. BTW): R 200.00, Formaat: Sagteband, 64pp)

.

.

.

>>

.

Vervolg

Ander digbundels in die jaartal:

2017,  2016  2015, 2014, 2013, 2012, 2011 & 2010

Bookmark and Share