Posts Tagged ‘Eunice Basson gedigte’

Eunice Basson. Girivana

Friday, May 24th, 2019

Girivana

Nasionale Krugerwildtuin

 

Jaar na jaar, dagin, daguit, tuimel

en swik golwe kwelea’s oor ’n krip

waar die egpaar Kay veertig jaar gelede

in verwondering na daardie ewigheid sou sit

en staar, moontlik onder die trosvy

met beskuit en tee die stilte indrink –

luister na wespe tussen soetsuur vruggies

en besluit om juis dáár ’n windpomp

te skenk, waar hierdie reisiger onverwags

’n koperplaatjie van erkenning

teen ’n stomp gewaar, nouliks die woorde

kon uitmaak soos wat groenspaan jaar na jaar,

dagin, daguit aan vergetelheid stroop.

.

© Eunice Basson / 2019

Eunice Basson. Bloedmaan

Friday, August 17th, 2018

Bloedmaan

By die dood van  Tom Gouws

 

Miskien het die digter sy potloodsak

reeds oopgerits, op dié eenmalige sfeer

gewag om tot Teken te verwoord –

sterflinge, soos ons almal,

sal vir jare nog hierdie skouspel

in stories oorvertel –

Miskien sou hy juis daardie aand

vredig wou boeke vat

om aan dié godswonder, soos die gras

van die veld, nederig dank te bring

toe die duisternis hom (voortydig) oorval.

 

 

© Eunice Basson, 2018.