Posts Tagged ‘Gedigte Zandra Bezuidenhout’

Zandra Bezuidenhout. Verjaardagborrel vir twee

Tuesday, October 1st, 2019

Verjaardagborrel vir twee

.

Twee Afrikaanse literêre ramme,

Breyten en Ampie, om hul met permissie

op die kaalvoetnaam te noem,

tart op tagtig die kalender

en kaperjol tot ligdag

in ʼn Wellingtonse digtersjaart.

 

Hier langs die veranda by Grevilleas

bring bewonderaars en poëte

ʼn hand vol vere

en speld die hele dorp se lente

aan die bors van hul idole.

 

Nou, op die negende verdieping

van hul jare,

staan die verjaardagkêrels

windmaker nader

vir  ʼn ongedanste dans

in die paradyslike seisoen.

 

Uit die karaf van die kontrei

skink ons ʼn dubbeldop

en drink ʼn heildronk

op twee bekwame keldermeesters

van die Wamakersvallei.

 

Mag hul oë nog elke somer

aardebruin soos appelkoospit glans

en hul name aan die oewer klink

wanneer klippe in die winter

omrol in die Bergrivier.

 

© Zandra Bezuidenhout

September 2019

Zandra Bezuidenhout. Fees van die skrywers

Thursday, May 17th, 2012

Fees van die skrywers

Writers Unlimited Festival, Den Haag

 

Onthou jy nog die salsa in die voorportaal

die vlugge voetwerk van die dansers

die polsmaat van ‘n klein orkes

waar skrywers en besoekers  woorddronk

tussen stasies afreis

om  in die lende van die nag van saal tot saal

blinkvet olywe, borrels  filosofie en poësie

vir droër dae te kom haal –

na maande flikker dit in die gedagte

die drukte om die boeketafels

die dolle praatjies en gelag van ingewydes

maar in onverwagte kronkels

klop veral

die tamtam van die salsa

in die voorportaal.

 

© Zandra Bezuidenhout. 2012