Posts Tagged ‘Johan Myburg’

Andries Bezuidenhout. Snare wat vir altyd vibreer

Friday, September 25th, 2009

Dit was gister lekker om mede-blogger Philip de Vos by die Woordpoort te ontmoet. Ek het ook die gespek met Johan Myburg en Johannes Prins oor hulle digbundels geniet. In ʼn stadium het die gesprek met die gehoor nogal warm begin raak, veral toe ons gesels het oor die media se dekking, al dan nie, van die digkuns. Die punt is weer gemaak dat die digkuns te veel dekking kry in vergeleke met byvoorbeeld kinder- en jeugliteratuur.

Later die aand het ek dit baie geniet om in die Maskerteater op te tree saam met Albert de Vos. As kind het ek gereeld in die studeerkamer geluister na hoe my ma klavierlesse gee. Vir die eerste les het sy altyd die klavier oopgemaak om vir leerlinge te wys hoe die instrument aan die binnekant werk – hoe die hamertjies die snare slaan om die klank voort te bring deur ʼn vibrasie te veroorsaak. Volgens haar het só ʼn vibrasie in teorie nooit opgehou nie.

As sy reg is, draal die keer wat Johannes Kerkorrel “Gee jou hart vir Hillbrow” in die Maskerteater gesing het tydens die Voëlvrykonsert daar – twintig jaar gelede – steeds in daardie ruimtes rond. Ek het toe maar my eie weergawe bygevoeg, al speel ek dit met ʼn kitaar en nie, soos wyle Kerkorrel, met ʼn trekklavier en ʼn botteltjie klippies as perkussie nie.

Dis maar my klein, onvolmaakte huldeblyk aan hom (tweede van regs af op die foto hier bo).

Ek en Albert het natuurlik elkeen ʼn liriek geskryf wat op ʼn manier op “Gee jou hart vir Hillbrow” antwoord – vanuit die oogpunt van so twintig jaar later.

Klaviere en kerkorrels. Soms wonder ek oor my ma se teorie, oor snare wat vir altyd vibreer. Dan gaan die geskiedenis waarskynlik op een groot kakofoniese crescendo eindig.

Ek en Albert tokkel vanaand weer ons snare in die Maskerteater – om 18:40.

Andries Bezuidenhout. Woord-akkoord by die Woordpoort

Wednesday, September 23rd, 2009

 

“Weet jy hoe dit voel as jy nie terug kan draai nie? Weet jy hoe dit voel as jy nie vorentoe wil gaan nie, maar nie stil kan staan nie?”

Ek hou daarvan om saam met Albert de Vos, of AD (in die foto hier bo saam met my), op te tree. Ek is mal oor sy musiek. Hy is ʼn singer-songwriter van formaat. Die twee van ons doen twee vertonings in die Maskerteater op die Tukkiekampus as deel van die Woordpoort. Ons probeer deur musiek om die raakpunte tussen digkuns en melodie te ontgin. Die tye vir die optredes, getiteld “Woord-akkoord”, is die volgende:

Donderdag, 24 September 2009, 21:15
Vrydag, 25 September 2009, 18:40

Dit kos R80, en R60 vir studente.

Dan gesels ek en Pieter Duvenage oor die toekoms van “minderhede” in Suid-Afrika, Donderdag om 10:00, en die aand gesels ek met Johan Myburg en Johannes Prins oor hulle digbundels en die digkuns in die media, om 18:00.

Meer inligting oor die Woordpoort hier.

Andries Bezuidenhout. “Flat, drab, boring” Oos-Kaap

Friday, August 14th, 2009

Ek is vanoggend verstom oor ʼn onderhoud wat Shaun de Waal met Steven Jacobs, die regisseur van die filmweergawe van Disgrace, in die Mail & Guardian gedoen het. In plaas van om die plaastonele in die Oos-Kaap te verfilm, is daar eerder besluit om dit in die Wes-Kaap te doen. Blykbaar kan ʼn mens die Hottentots-Hollandberge in die agtergrond sien, alhoewel daar steeds in die film na “nabygeleë” Grahamstad verwys word.

Die volgende uittreksel uit die onderhoud maak die redes vir die besluit heel duidelik. Steven Jacobs aan die woord:

“In terms of where we shot it, there were two reasons for that… One was economic — we had to be close enough to Cape Town. [ʼn Mens neem aan John Malkovich se hotelkamer] The second was that I wanted something that had an epic quality to it. I wouldn’t have shot it in the Eastern Cape. I didn’t even bother going there. It wasn’t my intention to shoot somewhere that was drab and flat and boring. I wouldn’t have done the picture that way. Other people saw the location shots, including Mr Coetzee, and they thought it was appropriate. I’m not an expert on South African landscape. I’m in the movie world. I’m dealing with a visual medium. I took a visual slant on the film that I thought was correct. It’s now up to people to decide if it’s successful or not. We did what we set out to do and I’m pleased with the result.”

Kan iemand asseblief vir die stomme man ʼn toer na die Oos-Kaap organiseer! Of dalk Johan Myburg se pragtige (maar steeds half siniese) gedigte oor die Oos-Kaap in Engels vertaal (uit Kamermusiek). Vat hom op die pad van Rhodes af terug Barkly-Oos se kant toe, laat hom regs draai by Moshesh’s Ford, tot by Lundin’s Nek (in die foto hier bo). Wys vir hom die berge. Of neem hom Nieu Bethesda toe, of die pad deur die Winterberge waar die Bezuidenhouts van Slagtersnek met die pandoers baklei het. Om hemelsnaam, selfs die vlaktes en berge rondom Grahamstad. Wys vir hom ʼn aalwyn. Laat hom die woord op Afrikaans sê: “Aalwyn.”

Wys dalk ook vir hom die filmweergawe van Na die geliefde land, waarin die vlaktes rondom Trompsburg pragtig verfilm is. Ten minste het die verfilming van daardie boek dít reggekry. Amper té goed.

Of dalk moet hy White Writing lees en agterkom hoe Coetzee skryf oor mense wat oor landskappe skryf. Dalk sal hy dan verstaan dat Coetzee selfs ʼn sjokoladedooskitch plek soos Kaapstad “drab and flat and boring” sal laat lyk.

Ek is jammer, maar teen die Oos-Kaap se landskappe is die Wes-Kaap nou nie juis “epies” nie. Of hel ek nou weer te veel na die ander kant oor?

Ek proes in my Oos-Kaapse voorgeslagte se roosterbrood met marmelade.

Maandag, 1 Junie 2009

Monday, June 1st, 2009
Mario van de Wall

TT Cloete (Foto: Mario van de Wall)

Gister was dit die verjaarsdag van een van die gróót geeste in ons digkuns: TT Cloete het naamlik 85 geword … In die media het daar dan heel gepas ‘n pragtige huldeblyk deur Johan Myburg verskyn met die titel Cloete vlieg flink op 85. Boonop het die Noordwes Universiteit prof. Cloete verlede Saterdag verras met ‘n spesiale huldigingskonsert, Seer en siter, wat bestaan het uit 35 van sy gedigte wat deur sy dogter, Thea Cloete-Oberholzer, getoonset en in die Sanlam-Ouditorium uitgevoer is. (Gaan lees die volledige berig hier.) Goeie nuus is ook dat TT Cloete weer aan die skryf is; volgens Johan Myburg is daar ‘n manuskrip in wording met die titel Ondigte gedigte.

Van ons kant wens ons ook net om prof. Cloete geluk te wens met hierdie besonderse mylpaal. Mag die nuwe jaar deurdrenk wees met vreugde en goeie gesondheid.

As ‘n verdere toegif vanoggend, hierdie pragtige vers uit die pen van TT Cloete hieronder.

‘n Lekker week vir almal.

LE

 

God die digter

daar is meer poësie in die sneeuvlokkie
as in die letterkunde en baie meer poësie
in die miskruier in die toktokkie
in die meteorologie en entomologie
in die moremis en in die bergpiek
die horison wat in die hemel wegraak
in die rooswolk is daar baie meer liriek
die aarde is deur ‘n digter gemaak

 “God die digter”, Uit: Driepas, Tafelberg Uitgewers, 1989)