Posts Tagged ‘Johann Lodewyk Marais gedig’

Johann Lodewyk Marais. Op ver strande

Wednesday, October 24th, 2012

OP VER STRANDE

Malindi, Kenia

 

Ek het uit die binneland gekom

en ‘n Thomson se gaselle

het opgespring en soos ‘n dolfyn

in die lugspieëling verdwyn.

 

Nou duik ek in die warm see

agterna tot by ‘n oorhang

in die rif waar dit rondwemel

van steen-, blink- en papegaaivis

so bont soos ‘n tropiese lap.

 

Terug op die strand hurk ek neer

en met my vinger teken ek

in die wit sand ‘n halfmaan, kruis

en sirkel met pyle deur getrek.

 

 © Johann Lodewyk Marais

Johann Lodewyk Marais. David Livingstone

Sunday, September 11th, 2011

DAVID LIVINGSTONE

Brought by faithful hands

over land and sea […].

                       

Verwyder die harslag en binnegoed

en begrawe dit langs ‘n mvula.

Vryf hom dan in met sout en brandewyn

en droog die lyk in die tropiese son

voor hulle dit optel, die bene buig

en versigtig met kaliko verbind.

Dan skuif hulle hom in ‘n myonga se bas

en word alles in seildoek toegedraai,

met teer bestryk en omswagtel.

Op die laaste reis van Chitambo af

na die voet van die Tanganyikameer

en deur woude, moerasse, riviere

en klowe op pad na Bagamoyo

bengel op die skouers van die draers

die liggaam van Livingstone aan ‘n paal.

Ná die reis per skip na Southhampton

en per trein na Londen eien artse

die linkerbo-armpyp wat lank terug

deur ‘n stormende leeu gebreek is.

 

 

© Johann Lodewyk Marais, 2011