Posts Tagged ‘Johann Lodewyk Marais gedigte’

Johann Lodewyk Marais. Mogadisjoe

Monday, September 23rd, 2013

MOGADISJOE

 

Hierdie dor stad teenaan die ewenaar

is die tuiste van donker Berberstamme

wat sedert menseheugenis hier bly

en hulle op die horisonne rig

waar hulle hulp vandaan sal kom.

Hulle wat die Bakaaramark besoek,

in die witgepleisterde moskees bid

en deur palmomsoomde strate stap,

het nog skaars poësie in die volksmond.

Hier skryn die taal van seemeeu, donkie

en kameel wat ter slagting gelei word

wanneer die son laatmiddag uitloop.

 

© Johann Lodewyk Marais / 2013

 

 

Johann Lodewyk Marais. Malindi

Monday, September 9th, 2013

MALINDI

 

Die bus ruk tot stilstand en onverwyld

kom tuktuks uit alle windrigtings aan

wat my op ’n besigtigingsrit wil neem.

Goed, ek spring by een in en ons rammel

deur die strate, verby ’n marktoneel

waar iemand ons groet, verby die huise

van Italianers wat kom sonbrand,

in die branders kapriol, rondflenter

en in die plaaslike boetik rondkyk.

’n Luo poseer by ’n ysterhek

voor ’n masker van sy stam en kom neem

’n munt uit my hand. Dan stap ek verder

deur die sand tussen die hoë mure

waar die mahobohobo’s en ranke

van broodwortels my na die see toe lei.

Op die paadjie verby die kremetarte

kom ek in die oopte en sien oplaas

die wit kruis van Vasco da Gama hoog

bo die koraalriwwe wat laagwater

oop en bloot na die noordooste toe lê.

 

© Johann Lodewyk Marais / 2013

Johann Lodewyk Marais. Jacques Cousteau

Saturday, September 1st, 2012

Jacques Cousteau

 

Aan die punt van die tafel praat ‘n man

in ‘n restaurant in Juan-les-Pins

met ‘n uitsig oor Cannes se baai

saam met duikers, bemanning van die Calypso,

wetenskaplikes, Philippe Tailliez

van die seepark op die Hyères-eilande,

en prins Rainier van Monaco.

Jacques Cousteau lig ‘n glas Bandol

van die suidhang van die Mauresberge.

Van nader beskou, is hy taamlik lank,

met ‘n neus krom soos ‘n dolfyn se vin

en bleekblou oë agter die bril

onder die halfmane van sy wenkbroue.

‘n Oomblik lank huiwer hy, skaterlag

en drink dan die imperiale rooi wyn

soos die kleur uit die skulpe van Toulon.

 

© Johann Lodewyk Marais, 2012