Posts Tagged ‘Marlise Joubert gedigte’

Marlise Joubert. Refleksies

Sunday, October 13th, 2019

refleksies

[dylan lewis. beeldetuin]

 

omhels dan hierdie dam soos ʼn gedig

want dis maklik om ʼn dam te word

met die oog spieëlblink

soos die pupil van ʼn waterlelie

om alles, alles raak te ken

 

omhels wydlopig die voetpaaie

met ruwe wenkbroue gras en klip

die kronkelare, met aan die lid

van die dam ʼn klein traanklier

om uit te loop op vleiwater

 

soos ʼn sinapse ontvou die beelde

met fantasmagoriese transgedaantes

in afgepaarde dier, voël of mens

torso’s van man of vrou met soms

ʼn enkele engelvlerk eroties

in lig en skadu gespan: organies

en gefragmenteerd –

 

in die kop van hierdie gedig

word jy droom, word jy dam

en is jou ganse oerlandskap

minimalisties uitgewring

 

berge beur handstil omhoog

bitterblou staan die buffels daar

en kyk die luiperd jou hondmak

in die hart

 

in los eilande van wildernis

sweef makette en sjamane

waar soms  ʼn vreemde dans

jou verras met die enkelritme

van ʼn been, arm of skouervlerk

totdat jy later nie meer weet

wat jy omhels het nie

 

was dit dam of dier, die berg

of lig: miskien net jou eie

fynboskurwe

met hierdie gedig –

 

 

[© marlise joubert. okt. 2019]

Marlise Joubert. Herfs

Wednesday, May 22nd, 2013

 

herfs

 

vandag staan die wolke skeef

druppende kerswas oor die land

ek wil dit nie verlaat nie

 

in die tuin ‘n geveg tussen vinke

verwers met kwasse en lere poleer

my mure met die kleur van sand

 

niks hiervan wil ek opgee nie

 

hoe laat is die groot verlaat

en sal jy later in jou eensaamheid

alle gedagtes oor ons liefde prysgee

 

vandag vlam die bome herfs teen die berg

alle vensterrame staan oop in die lig

vir die vars vernis om droog te word

          

dit wil ek nie agterlaat nie

 

© marlise joubert/2013

Marlise Joubert. Tussen gaan en bly

Monday, June 11th, 2012

tussen gaan en bly

('n brief vir Octavio Paz as antwoord op
  Entre irse y quedarse)

 

 

hier op Melkbos huiwer alles tussen gaan en bly

die winterson steeds verlief op die see se glans

 

die lang strand is nou ‘n baai met wandelpaaie

waarlangs die dorpie stil soos ‘n eier blink

 

alles is ver: Tafelberg en bote en meeue

alles is naby en ontwykend vir enige aftasting

 

by die Damhuis sit ons as digters bymekaar

die biefstuk, die vis, die wyn rus in hul name se kleur

 

kinders herhaal ons jare wat was

woorde met geen verband val los oor die tafels

 

die lig verander die tuinbeelde in ‘n teater

terwyl karre verbyskuur na ander bestemmings

 

ek ontdek myself in jou oog Octavio

soos bloed vloei die dag se hart na sy einde

 

op pad huistoe verdwyn die kus in hawens en valleie

ons het gekom en ja, ons het gegaan: ‘n asemreis ver

 

 

© marlise joubert. Junie, 2012

 

*

 

between going and staying

(a letter to Octavio Paz in reply to
 Entre irse y quedarse)

 

here in Melkbos everything drifts, not going, not staying

the winter sun still in love with the glow of the sea

 

the long beach is now a bay of leisurely walkways

beside which the small town glistens like an egg

 

everything is far: Table Mountain, boats and seagulls

everything is nearby, eluding any sense of feeling

 

at the Damhuis we poets come together

the steak, the fish, the wine at rest in the colours of their names

 

children replay our years that have passed

unattached words are strewn across the tables

 

the light transforms the garden figures in a theatre

whilst cars brush past to other destinations

 

i discover myself in your eye, Octavio

like blood the day’s heart flows towards its end

 

on the way home the coast disappears in harbours and valleys

we had come and, yes, we had left: a breath’s journey away

 

(vert. deur/ tr. by Charl Cilliers, 2012)