Posts Tagged ‘Nicolette van der Walt gedigte’

Nicolette van der Walt. Doekvoet

Sunday, January 15th, 2017

Doekvoet

(Bunolagus monticularis)

 

In die Karoo Hooglande is tyd

in die sterre,

en deur die groot teleskoop

kan jy die oorsprong van die heelal

tussen Jupiter se mane

en kwasars opspoor.

Die Khoisan kon die melkweg

met die naakte oog bespied

en in die donker niet

van riete die spoor

van doekvoetjies naloop.

Deur die geweerlope van jagters

verskiet die skaars sterre

van die haseryk: die doekvoet

se tyd loop soek-soek uit.

 

 

© Nicolette van der Walt / 2017

 

Nicolette van der Walt. Hyperion

Monday, October 31st, 2016

Hyperion

Sequoia sempervirens

 

Óók hierdie reus se oorsprong is minuskuul,

die vlug van saad uit die keël windaf

na waar varings en valleie sag

in die mis wag. Teen die slape van heuwels

kring die stam uit die kalligrafie

van sy wortels. ’n Buurtwag

van swamnetwerke spoor die boom

op die lang reis na die kroon aan –

selfs lig maak ruimte vir hom.

Die oppergod van die vertikales,

aartsvader en super fotosinteerder

slaap nie; hy konsentreer elke sening

op die opwaartste beweging van

voedingstowwe en reën –

die geduld van heiliges is eie aan hom.

Onaangeraak deur herfs

rig die rooihoutboom eeue

van suurstof en skadu teen die son op,

en in die holtes van ouhout, skuilte

aan gevlekte ooruile.

 

Ingeplaas in ’n laagte langs ’n kus skuil

die hoogste een teen die mens:

óók die stryd om bewaring is kolosaal.

 

 

© Nicolette van der Walt / 2016

Nicolette van der Walt. Roosdig

Monday, March 7th, 2016

Roosdig

.

In die skemergloed, in die skrape

aan die dag se gekwesde voet,

het vader Ludwig die sierkleed

van ’n roos vermoed:  alarmrooi,

ligtend gelaag teen die naderende nag

met sy sterklitse en maan.

.

Hy het na die snysel in sy palm gestaar,

dit teen horison en vlam beskou,

en in die kweekhuis van sy hande

kroonblaar en nektar konsentries

daarom tot vuurknop, geurkruik

en kokarde vir Venus gevou.

.

Selde nog is verwonding so perfek

tot septer geskulp – digters,

minnaars en rouklaers knieknik voor haar.

.

© Nicolette van der Walt / 2016