Posts Tagged ‘Poeziecentrum’

Afrikaanse digkuns pronk in die buiteland

Thursday, February 10th, 2011
Poëziecentrum

Poëziecentrum

Die Poëziecentrum in Gent is ‘n droom. Nie net vanweë die imposante gebou op Vrijdagmarktplein waarin dit gehuisves is nie, maar ook omrede dit as uiters dinamiese sentrum soveel aktiwiteite en dienste bied, dat dit enige poësieliefhebber se hartklop tot in die ekstreme versnel. En steeds is dit nie die enigste rede nie. Die feit is dat die grootste versameling van Afrikaanse digkuns buite ons landsgrense hier aangetref kan word.

Luidens hul mees onlangse Nuusbrief, die volgende: “Het Poëziecentrum bezit de grootste collectie Zuid-Afrikaanse poëzie in de Nederlanden. De kern van deze collectie bestaat uit de nalatenschap van de Zuid-Afrikaanse dichter en academicus Ernst van Heerden, die op initiatief van een aantal Zuid-Afrikaanse academici en Vlaamse geïnteresseerden in de collectie van het Poëziecentrum kon worden opgenomen. Door de financiële ondersteuning van de PUK-Kanselierstrust van de Noordwes-Universiteit (RSA) en de bereidwillige ondersteuning van o.a. Wannie Carstens, Louis Esterhuizen, Protea-Uitgewers en NB-Uitgewers, kan de collectie verder uitgebouwd worden met regelmatige zendingen. De Collectie Ernst van Heerden omvat meer dan 1000 boeken, cd’s en naslagwerken”

Hierdie is inderdaad een van die opwindenste en mees bevredigende inisiatiewe waaraan ek nóg die voorreg gehad het om mee te werk; al is my taak as bestuurder van ‘n bepaalde boekwinkel op Stellenbosch gewoon om hul poësieversameling gereeld aan te vul en op datum te hou.

Collectie Ernst van Heerden

Collectie Ernst van Heerden

Tog kan ‘n mens dit nie verhelp om van vreugde te gloei wanneer jy foto, wat tans op die hoofblad van die Poëziecentrum se webtuiste pronk, sien nie. Dit is ‘n foto wat Stefaan Goossens geneem het van die spesiale uitstalling wat hulle met die nuutste bundels wat hulle ontvang het, gehad het. Van bo, links na regs, kan die volgende bundels herken word: Ligloop (Tom Gouws), Tydelose gety (Lina Spies), Oewerbestaan (Melt Myburgh), Notas uit die empire (Hans Pienaar), Aan ‘t stap (Len S. Louw), Diorama (Johann Lodewyk Marais), Versindaba 2010, Die mooiste Afrikaans liefdesgedigte (saamgestel deur Fanie Olivier), Uit die wit lig van my land gesny (T.T. Cloete), Toevallige tekens (Martjie Bosman), Nadoodse ondersoek (Martina Klopper) en Twintig verse in vertaling (Koos Oosthuysen).
Ai, wat ‘n lekkerte!

***

Sedert gister het Philip de Vos ‘n nuwe bydrae gelewer. En dié een handel oor hoe om op ‘n mooi manier (en met humor) wraak te neem. Thomas Möhlmann is ‘n gerekende digter in eie reg, maar in sy posisie as redakteur van die poësietydskrif Awater is hy eweneens ‘n belangrike rolspeler in die Nederlandse digkuns. Daarom is sy resensie van Ronelda Kamfer se digbundel, Nu dat slapende honden, wat onlangs in die Nederlandse vertaling deur Alfred Schaffer by Podium verskyn het, ‘n beduidende bydrae tot Wisselkaarten. Dié resensie het in die nuutste uitgawe van Awater verskyn.

Pure leesplesier.

Mooi bly.

LE

 

 

Essaybundel takel grense af …

Monday, June 29th, 2009
Stefaan Goossens & Ronél Foster

Stefaan Goossens & Ronel Foster

Goeie nuus is dat ‘n nuwe publikasie, Over grenzen – Oor grense, pas in België verskyn het. Hierdie essaybundel is saamgestel deur Ronel Foster (Universiteit Stellenbosch), Yves T’Sjoen (Universiteit Gent) en Thomas Vaessens (Universiteit van Amsterdam) en bevat vergelykende studies oor die Afrikaanse, Nederlandse en Vlaamse poësie. Suid-Afrikaanse medewerkers aan dié publikasie is onder andere Dorothea van Zyl, Lina Spies, Hennie van Coller en Heilna du Plooy. Onder die essays wat hierin vervat is, is daar byvoorbeeld ’n studie oor die verwantskap tussen Elisabeth Eybers en M. Vasalis. Op die foto hiernaas oorhandig prof. Foster ‘n eksemplaar van die boek aan die Poeziecentrum in Gent se Stefaan Goossens, kurator van die Ernst van Heerden-versameling. (Gaan loer gerus by die Poeziecentrum se webblad in vir nog foto’s en ander relevante brokkies nuus.)

Nietemin, met die verskyning van Louise Viljoen se Ons ongehoorde soort – beskouings oor die werk van Antjie Krog onlangs, asook HP van Coller se pasverskene Tussenstand – Letterkundige opstelle, wil dit voorkom asof die bekommernis jeens die tekort aan akademiese besinning oor die letterkunde waartoe die poësieliefhebber toegang het – iets wat onlangs nog op hierdie webblad deur Antjie Krog geopper is – besig is om uit die weg geruim te word.

Ten slotte, gedurende die naweek het ons webmeester sommer heelwat nuwe leesstof op die webblad gelaai: so is daar ‘n vraaggesprek wat dr. Hans Ester met Lina Spies gevoer het; ook is daar ‘n (voorheen as flapteks gepubliseerde) artikel deur Charl-Pierre Naudé en nog ander vele ander lekkerleesstof.

Geniet dit – en mag hierdie week jou buite alle perke verras …

Mooi bly.

LE