Versindaba
~ ‘n Kollektiewe weblog vir die Afrikaanse digkuns ~

Dis is weer daardie tyd van die jaar in Stellenbosch: so tussen die hooikoors, eksamen-navrae van studente en nasienwerk deur kry ‘n mens net nie kans om daardie inskrywing oor Roethke, wat jy nou al twee weke in gedagte het, te pos nie. Jy kry ook nie kans om die somer se aankoms ordentlik te vier nie. November is ‘n berg wat jy moet uit. Jy sit en werk tot laat in die nag; jou oorfone pols Prokofiëf se klavierkonserte deur jou moeë brein (die ‘remastered’ Neemi Jarvi stel uit 1990 of 1991, met die pianiste Boris Berman en Horacio Guittierrez); jy drink te veel koffie. Met jou laaste bietjie energie, tussen neertuimel in die bed en slaap, lees jy darem Hennie Aucamp se nuwe bundel, Die huis van die digter en ander liefdesverhale, storie vir storie deur. En wat ‘n bundel is dit nie! (Word vervolg…)