Natuurlik word daar nou wyd en syd in die Britse media bespiegel oor wie Ruth Padel as die Oxford Professor of Poetry gaan opvolg na haar skokbedanking ‘n week na haar aanstelling. (Lees die Nuuswekkers vir 18 Mei en 26 Mei vir meer agtergrondsinligting indien jy die hele gedoente gemis het.) Volgens ons korrespondent in Cambridge bestaan daar breë konsensus dat die kandidaat wél ’n vrou moet wees. Anne Stevenson se naam word genoem; alhoewel haar gevorderde leeftyd (76), asook haar welbekende renons in openbare optredes, teen haar benoeming mag tel. Alice Oswald, een van Engeland se mees gewilde digters, is nog ’n sterk kandidaat, maar die feit dat sy nie juis as akademikus bekend is nie, mag teen haar tel, berig ons korrespondent. ’n Baie sterk buiteperd is egter die Kanadese digter Margaret Atwood. Bekend as digter, kritikus, skitterende spreker, asook ’n persoon met internasionale aansien, is sy waarskynlik presies die kandidaat wat nou vereis word. Haar uitgesprokenheid mag egter dalk iets wees wat die vuisvoos akademici te Oxford effens kriewelrig maak; so het Atwood enkele maande gelede nog te midde van goot vertoon haar deelname aan die jaarlikse Emirates Airline International Festival of Literature in Dubai gekanselleer vanweë die feit dat homoseksuele persone nie welkom is in die Emiraat nie. (Haar brief aan die organiseerders kan hier onder die skakel “What is new?” gelees word.)
Terloops, Babu Lefti, ons reisende (amper sê ek afwesige) blogger was juis ook teenwoordig by dié geleentheid; lees gerus sy blog en wat hy te sê het oor die Doebaaise fees indien jy Babu se eerste bydrae gemis het. Mmm, dan hoop ons sommer ook terselfdertyd dat hy darem al weer terug is in die beskawing ná sy ekskursie in die Turkse hooglande. Ons sien uit na jou volgende vertelling, Babu! So, laat waai Meraai …
Mag hierdie week klipvry wees vir jou.
Mooi bly.
LE