Verlede week het die Online University Reviews hul Top 100 Poetry Blogs bekend gemaak. Uiteraard is ’n onderneming van hierdie aard gedoem daartoe om subjektief en onvolledig te wees. So kon ek byvoorbeeld geen webblad identifiseer wat buite die grense van die Verenigde State van Amerika val nie. Sug. Die vermetelheid darem, nê … Om Wittgenstein effentjies aan te pas: “Die grense van my wêreld is die grense van my kliek.” Nietemin, onder dié lys vind jy bykans alles en almal wat selfs net rakelings met die poësie in die VSA te make het; van “korporatiewe” webtuistes tot persoonlike ego-ruimtes.
Ek is darem ook verlig om te kan sê dat die Amerikaanse webtuistes wat onder ons “Skakels” op hierdie webblad gelys is, almal onder dié uitverkore groep van 100 teenwoordig is; hieronder tel ook een van my persoonlike gunsteling, One Poet’s Notes, wat nogal die 32ste plek beklee! Die enkeles wat ons wel gemis het, sal mettertyd bygevoeg word. So, raak ’n bietjie avontuurlustig en verken die kuberstand van die Amerikaanse digkuns vandag.
Mooi loop en kliek versigtig deur die mynveld van inspirasie.
LE