Dit is onlangs bekend gemaak dat die befaamde “Biblioteek van Verbrande Boeke” aan die Universiteit van Augsburg verkoop is vir die bedrag van 410,000 euro. Hierdie unieke versameling van 14,500 boeke deur 80 skrywers is almal boeke wat in 1933 in Duitsland verbode verklaar is en op 10 Mei van daardie jaar op die brandstapel beland het. George P. Salzman het dit sy lewenstaak gemaak om dié versameling, wat uitsluitlik uit eerste uitgawes bestaan, oor ‘n tydperk van 30 jaar byeen te bring. Onder die groep van ongewensde boeke is daar uiteraard ‘n magdom titels deur Joodse en Marxistiese skrywers, waaronder etlike literêre reuse soos Thomas Mann, byvoorbeeld. “Hierdie unieke bronversameling bied ‘n verteenwoordigende oorsig van die Duitse literatuur tydens die Nazi-era van 1933 tot 1945,” het Wolfgang Heubisch, die Beierse Minister van Wetenskap, gesê. “Die ‘Biblioteek van Verbrande Boeke’ is van uitsonderlike belang vir literêre en politieke navorsers.” Volgens De Papieren Man was hierdie transaksie die resultaat van 10 jaar se intensiewe gesoek na ‘n heenkome vir sy versameling, het Salzman self tydens die ondertekening van oordrag vertel. “Ik heb met veel onwetendheid en desinteresse gekampt en er vaak aan gedacht de handdoek in de ring te werpen. Maar nu ben ik zeer blij dat dit cultuurgoed de Duiters kan herinneren aan een troebel aspect van hun verleden.” Die volledige berig kan hier op die Duitse webblad Boersenblatt gelees word. Dié unieke versameling sal glo volgende jaar reeds oopgestel word vir die publiek.
En onthou – iemand het eenkeer gesê dat die grootste aanklag teen die mensdom nié die boeke is wat op brandstapels beland nie, maar die boeke wat ongelees op boekrakke bly staan. So, koop vandag nog ‘n boek en LEES!
Hieronder volg ‘n vers deur Bertolt Brecht wat na Engels vertaal is deur John Willett en in The poetry of survival (1991: Anvil Press Poetry) verskyn het.
Mooi bly en geniet die naweek.
LE
The burning of the books
When the Regime commanded that books with harmful knowledge
Should be publicly burned and on all sides
Oxen were forced to drag cartloads of books
To the bonfires, a banished
Writer, one of the best, scanning the list of the
Burned, was shocked to find that his
Books had been passed over. He rushed to his desk
On wings of wrath, and wrote a letter to those in power
Burn me! he wrote with flying pen, burn me! Haven’t my books
Always reported the truth? And here you are
Treating me like a liar! I command you:
Burn me!