In gister se Nuuswekker kon ek net so in die verbygaan verwys na die Dutch Bloggie wat pas aan De Papieren Man toegeken is. Hulle het dié toekenning in die kategorie Beste Literatuur Weblog verwerf. Hierdie prys, wat in 2008 deur De Contrabas gewen is, is die belangrikste Nederlandse prys vir weblogs.
Merel Roze, die paneel van beoordelaars se segsman, het die toekenning soos volg gemotiveer: “Hij (De Papieren Man) plaatst elke dag een nieuw stuk op zijn site, en houdt zich altijd aan zijn kader: literatuur. Soms plaatst hij nieuws, nooit te lui om goede links erbij te zetten, waardoor je de site echt als portal kunt gebruiken. Hij houdt de actuele vetes in de boekenwereld bij en belicht ze van beide kanten. Dan weer plaatst hij een recensie of een beschouwend stuk. Dat doet hij bijna helemaal alleen, wat de waardering van de jury kon wegdragen.”
De Papieren Man word deur Dirk Leyman en Hans Cotty bedryf. Die volledige berig kan hier gelees word, terwyl gelukwensinge hier te vinde is. Al wat ek weet, is dat dit geen geringe prestasie is om ‘n uitsonderlike webblad soos De Contrabas die loef af te steek nie. Dis ‘n enorme prestasie! Veels geluk, Dirk en Hans. Lank leef die voubare man …
***
Dan het daar sedert gisteroggend sommer ‘n hele paar briewe ter terugvoer van verlede naweek se fees in die Brieweboks beland, asook twee nuwe blog-inskrywings. Melt Myburgh gee terugvoer oor sy ervarings van die fees, terwyl Carina Stander weer reëls afluister vir ‘n gedig. En dan moet jy beslis by die fotogalerye ‘n draai maak; al die foto’s is uiteindelik gelaai. Baie dankie ook aan almal wat vir ons foto’s gestuur het. Mmm, dis omtrent soos ‘n tweede skeppie room op jou poeding. Of wat praat ek alles?
Lekker lees en hê pret vandag.
Mooi bly.
LE