‘n Nijmeegse digter, Ruud Linssen, het besluit om die gedagte van gedigte maak as “bloedsweet” baie letterlik te vertolk en beoog om die gedigte vir sy debuutbundel, wat vroeg volgende jaar verskyn, in sy eie bloed te laat druk. “Bij mijn weten is drukken met menselijk bloed in Nederland of België nooit eerder gebeurd. Dus doktert een team van bloedspecialisten, inktdeskundigen en scheikundigen een formule uit om mijn bloed geschikt te maken om ermee te drukken,” het Linssen gesê. “Of het zal lukken, weten we nog niet. Het proefdrukken moet nog beginnen. Ze hebben me een halve liter bloed afgenomen en die zal worden aangevuld met een even grote hoeveelheid vetten. Een liter moet volstaan om het boek gedrukt te krijgen.”
Blykbaar handel Linssen se bundel in hoofsaak oor die fisiese en sielkundige lyding van die mens; ‘n pleidooi vir die behoud van lyding as teenwig vir die hedendaagse mens se obsessie met “geluk”. Dis nou volgens Het Nieuwsblad se beriggewer.
Linssen se uitgewer, Underware, is héél ingenome daarmee om hierdie “bebloede” affêre uit te gee, aangesien hulle spesialiseer in ongewone publikasies. (So is daar byvoorbeeld ‘n vorige publikasie van hulle wat jy net in die sauna kan lees. Sodra jy na buite gaan en die humiditeit afneem, vervaag die drukwerk.)
Nou ja, kyk. Dít is gewis extreme poetry op sy ergste. Of wat praat ek alles?!
Die volledige berig kan hier op Het Nieuwsblad se webtuiste gelees word.
Vir jou leesplesier plaas ek vanoggend een van die mooiste onlangse Afrikaanse gedigte oor bloed wat ek van weet onderaan: Carina Stander se gedig “Vulkaanklip” uit haar nuutste bundel.
***
En dan is dit nou behoorlik komkommertyd op die webblad. Daar is niks nuuts om aan te kondig nie.
Daarom – geniet die rustyd; waar jy jou ook al mag bevind. Die jaar lê op sy rug.
Mooi bly.
LE
VULKAANKLIP
Hawaii
vulkaanklip is die naghemel van ‘n eiland
vulkaanklip is swart vlegsels met koper spikkels
vulkaanklip is vuurvlieë in die wonde van God
wanneer pluimsteen spat
word die reënwoud
in ‘n oogwink
‘n blink begraafplaas
skaars ‘n armlengte onder jou voet
vloei riviere van vuur
rooi soos Bloed
rooi soos Bloed
(c) Carina Stander (uit: woud van nege en negentig vlerke, 2009: Tafelberg)