Teen dié tyd is dit algemene nuus dat Europa tans sy koudste winter in dekades beleef. So praat hulle van die sneeuval in Nederland as die hewigste die afgelope 100 jaar en in Engeland die koudste winter in 30 jaar. Temperature van ver onder vriespunt word daagliks aangeteken.
Metro het egter einde verlede week ‘n berig geplaas wat nie anders kan as om ‘n mens te ontroer nie, naamlik dat talle mense – meestal pensionarisse – tans veral hardebanduitgawes van boeke aankoop om dit as vuurmaakmateriaal te gebruik aangesien dié boeke, wat meestal per kilogram op uitverkopings aangebied word, veel goedkoper is as steenkool of gas. “Book burning seems terribly wrong but we have to get rid of unsold stock for pennies and some of the pensioners say the books make ideal slow-burning fuel for fires and stoves” het ‘n boekhandelaar in Swansea glo gesê.
Dié ongelukkige toedrag van sake het ontstaan vanweë die feit dat die prys van gas sedert Januarie 2008 met 40% gestyg het en dié van elektrisiteit met 20%; prysstygings wat bykans onbekostigbaar vir veral bejaardes maak, ten spyte van die feit dat persone ouer as 60 jaar vir ‘n winter-toelae van tussen £125 en £400 kwalifiseer.
Ruth Davison, verteenwoordiger van die National Housing Federation, het die volgende te sê gehad: “The spiralling cost of energy means heating homes has become a luxury rather than a necessity for many people – particularly the elderly, low paid and unemployed.”
En op dié manier het die volgende uitspraak van Anthony Burgess waar geword: “The possession of a book (has) become a substitute for reading it.” Of is Franz Kafka se uitspraak dalk meer pertinent? “A book ought to be an icepick to break up the frozen sea within us.” (Albei aanhalings uit: Writers on writing, 1986: Headline Publishers.)
Nietemin, as toegif vanoggend ‘n profetiese gedig van vriend Jan de Bruyn wat enkele jare gelede oorlede is.
***
Intussen is nog drie fokusstukke deur ons bloggers geplaas: Philip de Vos, Bernard Odendaal en Ilse van Staden. En dan het daar ook nog twee briewe deur lesers in die Brieweboks bygekom. Op die Klikbord is die volgende twee belangrike skakels vir jou leesgerief geplaas: Antjie Krog se insiggewende lesing oor selfvertaling wat gister op LitNet geplaas is, asook Stefan Van den Broek se analise van die stand van Vlaamse resensiens wat in die nuutste uitgawe van rekto:verso verskyn het.
Lekker lees en geniet die dag wat in jou hande lê.
Mooi bly.
LE
Die aarde is ‘n ou gebou
is nie meer bewoonbaar nie
tussen die roet en wolke
roes die rame deur
die dae val
stukke pleister
Hier is die kelder
waar ek tydelik woon
hier is die skrif aan die muur
en repe óú geel
muurpapier van die son
en die gebreekte ruite reën
(c) Jan de Bruyn (Uit: Vuurtent in die sneeu, 1984: Human & Rousseau)