Nou ja, toe. Gister is Valentynsdag wêreldwyd gevier en ek is seker dat liefdesverse in bykans elke huishouding waar doenlik voorgelees en uitgeleef is … Op die BBC se webblad het ek egter ‘n besonder interessante artikel raakgelees. Hiervolgens het navorsers by die Aberystwyth Universiteit onderneem om te bewys dat bloeddruk ten hemele neig met die lees of aanhoor van liefdespoësie.
So is daar byvoorbeeld verhoogde bloedvloei na die voorkop en ‘n droë tong waargeneem met die voordrag van John Keats se bekende gedig “Bright Star”. Met die voorlees van Andrew Marvell se “To His Coy Mistress” is “instant fires in every pore” vermeld.
Die vraag wat natuurlik onmiddellik by ‘n mens opkom, is in welke mate dié verhoogde bloedtoevloei wel die gevolg is van die poësie, aangesien dit uiteraard ook die gevolg van erge verleentheid of selfs “stoute gedagtes” kon wees … “There are a range of emotions caused by love,” het Dr Marggraf Turley, leier van die studiegroep, tydens die beplanningsfase gesê. “Embarrassment is part of the experience of love, but we will be holding controlled tests and we’ll invite students to become involved with the poetry […] There is a serious side to these experiments. We hope to prove that there’s not only a cerebral dimension to reading love poetry but that it can also produce measurable physical effects.”
Ongelukkig sal die finale uitslae van dié toetse eers oor ‘n paar weke beskikbaar wees. Maar nou ja, oudergewoonte sal Nuuswekker jou op hoogte (of is dit blosend?) probeer hou …
***
Sedert Vrydag is daar nie juis veel nuwe stof op die webblad geplaas nie. Op sy blog lig Melt Myburgh wel die sluier so effentjies op nog vyf poësie-produksies wat tydens die komende Woordfees gaan plaasvind. En dan kan jy intussen by Publikasies gaan inloer waar inligting oor komende bundels geplaas is. Die eerste daarvan – Drieluik deur Floris A. Brown en Marion de Vos, met foto’s deur Hilde Vaatstra – is reeds in die winkels beskikbaar.
Vir jou leesplesier plaas ek ‘n gedig van Marion de Vos onder aan vanoggend se Nuuswekker.
Lekker lees en mag dié week uitgedek lê met besonderse vreugdes vir jou.
Mooi bly.
LE
Narcissus
Ik keek in het water
en zag de zon in mijn haar.
Ik wilde blijven kijken,
zag geen gevaar.
Prompt werd ik beslopen,
gezogen in een dal.
Ijdelheid en hoogmoed
komen voor de val.
Beter had ik de mensen omarmd.
Mijn ijdel hart
met liefde verwarmd.
Mijn versteend beeld
in het water,
een rimpel in het levensmeer,
waarschuwt mij:
Er is geen later
je tijd is op en keert nooit weer.
(c) Marion de Vos (uit: Drieluik, 2010: FAB Produksiehuis)