Karlien van der Merwe. Die ekologie:

Hundertwasser

Hundertwasser

 

 

 

 Ek hoop my gedig oor `n argitek wat omgegee het vir die ekologie en ruimte gelaat het vir die natuur, laat ons stilstaan en dink. Ek het verby `n plakkerskamp in Boksburg gery en die vindingrykheid van die bewoners was wonderlik!  

 

  

 

 Friedensreich Hundertwasser Vryheid:

 (Friedrich Stowasser, 1928 – argitek en skilder, gebore in Wene. Hy verwerf bekendheid as argitektoniese geneser en beskermheer van die ekologie en herdoop homself Friedensreich Hundertwasser.)

 

 

Verbeel: voorgeelose Vredeskoninkryk Honderdwater vryheid

waar inwoners uit skimmelvlek en metaalstof

blyplek knoeibou uit oorskiet, Koo-blikke en koeldrankbottels.

Kegeltorings en groen lappies-sinkplaat word dakke waarop kakiebos

en mos onbelemmerd vervuil sodat die inwoner, sonskyn-oggende,

halflyf uitleun by `n uitkykvenster en kriebelkris

patrone of helder stippels krabbel 

omdat hy sonder voorgee is.

 

Versin: `n voortuin met sonneblom en hoër-as-dakhoog bome

wat mure waarteen bouers en bokke urineer weg du:

leemklei in aardskleure wat asemhaal en bloei,

klein vensters waardeur `n mens skreefoog sien

en binne:

golwende ongelyk teëls en vloerbarste gevul met pienk Polyfilla.

 

Gee die binneversierder keramiekteëls in Krismiskleure

om die eerste en laaste lig te kaats.

Oorweeg: teen een blouselblou binnemuur

drie eende in vlug,

onderstebo.

 

Ek herinner my so:

oom Isak se dorpskafee se agterplaas-levvie

met die pers mure waarteen grondklam jaar na jaar ál perser klim.

tant Siena se bal-en-klou plaasbadkamer

waar blosende reiers eenbeen gestensil staan. 

Die toiletrol is `n Kewpiepop met `n haaits hoepelrokkie aan.

 

Langs die katjiepiering op Rooikop

is `n tuinstoel-huis met `n

fraaiing bedsprei op.

 

Karlien van der Merwe.

Bookmark and Share

Comments are closed.

  •