Volgens ‘n berig op Boekendingen se webtuiste is die veelgeroemde Espresso Book Machine nou vir die eerste keer buite die grense van die VSA in gebruik geneem en wel deur die American Book Center in Amsterdam. Hierdie logge apparaat, wat in 2007 al deur Time Magazine as die uitvinding van die jaar aangewys is, kan binne enkele minute op aanvraag ‘n boek digitaal en wel volgens ‘biblioteekgehalte’ druk. Die lys van beskikbare titels is glo meer as drie miljoen. Hierdie prosedure is veral gewild by die herdruk van boeke wat dekades reeds onverkrygbaar is, of natuurlik vir die druk van ‘n eie boek.
Volgens Lynn Kaplanian, direkteur van die American Book Center, is dié Boek-Espresso ‘n groot aardigheid; veral vir kinders: “Het is een soort van toverlantaarntje. De zijkant is open en je ziet uiteindelijk het boek uit een gleuf vallen.”
Die EBM druk 112 bladsye per minuut en lewer die eindproduk met volkleurvoorblad en professionele binding. Volgens Kaplanian moet 5,000 boeke per jaar gedruk word ten einde die koste van dié masjien te verhaal. Ongelukkig meld die berig nie wat die koste verbonde aan dié drukproses is nie en ook nie in welke mate dit as teenvoeter op die elektroniese boek gesien kan word nie.
Vir jou leesplesier volg Dave Graham se gedig “espresso poem” onder aan vanoggend se Nuuswekker.
***
Gister was omtrent ‘n bedrywige dag op die webblad. So is daar nuwe bydraes deur Jan Pollet, Marius Swart, Andries Bezuidenhout, Philip de Vos, Desmond Painter en Jo Prins om te geniet; asook ‘n nuwe digstring waarin Melt Myburgh meer vertel oor die ontstaan van sy gedig “toeval” en ‘n splinternuwe vers deur Joan Hambidge.
En alreeds is dit Woensdag. Die week is daarmee heen …
Mooi bly.
LE
espresso poem
a machine scream,
steam belches
fire, through
beans, ground fine
packed snug
they let
liquid drip, dark
bitter, molten
to cup
thus crema sits
golden, thick
atop perfection
© Dave Graham