Andries Bezuidenhout. vir die winterwind om op te hou waai

Albert de Vos het ʼn baie mooi song geskryf met die titel “September 2001”. In die lied is daar ʼn vrou wat in haar BMW langs die see parkeer, waar sy bly sit. “Net nog ʼn siel wat wag vir die winterwind om op te hou waai,” sing Albert. Die lied se titel is al leidraad na waarna daar verwys word.

Vandag, nege jaar gelde.  Ek sit in my kantoor, kyk gou op die internet wat in die nuus gebeur. Op News24 se web is ʼn foto van ʼn brandende gebou. (Ek sou later by my ouer broer Nick, wat toe vir Media 24 gewerk het, hoor dat hulle pas die tegnologie aangeskaf het wat TV beelde oombliklik na ʼn rekenaarformaat toe kan oordra; dis nou om Big Brother op die web ook te kan dek.) Die storie sê dis in New York. Ek roep my Amerikaanse kollega Bridget, wat in die kantoor reg oorkant myne sit. Sy kom kyk. “My God! It’s the World Trade Centre,” skree sy.

Ons hardloop af na die koffiekroeg langs die Wits Theatre. Hulle het ʼn TV. ʼn Hele paar mense staan reeds en kyk CNN. Ons sien hoe nog ʼn vliegtuig deur die tweede wolkekrabber se glas en beton ploeg. Ek hoor hoe ʼn paar mense saggies sê: “Yes!” Amper soos as iemand van jou span ʼn doel skop, of eerste oor die wenstreep hardloop.

Bookmark and Share

Comments are closed.

  •