Wilhelm Knobel gehuldig by Versindaba

Wilhelm Knobel

Wilhelm Knobel

Wilhelm Knobel, die vroeë Sestiger-digter, sou op 26 Oktober vanjaar 75 jaar oud geword het.

Tydens Versindaba op Saterdag 18 September sal Emeritus Professor Deon Knobel, die jongste broer van die digter, om 14.00 in die Ou Hoofgebou saam met dr. Marius Crous  van NMMU deelneem aan ʼn huldigingsprogram vir die digter. Knobel gaan oor persoonlike aspekte van sy broer se lewe praat terwyl Crous ʼn oorsig van die digter se werk sal lewer.

As jongste broer het Deon van vroeg af Wilhelm se vreugdes, teleurstellings en dikwels moeilike dae van siekte meegemaak.

Nadat sy studentejare op Stellenbosch onderbreek is deur ʼn stryd met bipolariteit, keer Wilhelm in 1955 terug na die Universiteit en behaal ongeëwenaarde sukses in sy volgende vyf jaar van studie. Twee honneursgrade – in Filosofie (1958) en Frans (1959) – word albei cum laude aan hom toegeken. Op grond van hierdie prestasies word ʼn beurs vir studie aan die Sorbonne in Parys deur die Franse regering aan hom toegeken. In 1962 vergesel Deon sy broer uit Frankryk na Suid-Afrika na ʼn massiewe bipolêre aanval en siekte.

Met die onverwagte en voortydige dood van Wilhelm op 4 Januarie 1974 op die betreklike jeugdige ouderdom van 38 jaar, het Deon onmiddellik die uitdaging en verantwoordelikheid aanvaar om toe te sien dat sy totale nalatenskap, insluitende sy versameling skilderye en veral sy nagelate dokumente en manuskripte, nie verlore gaan nie.

Sedert sy aftrede in 2004 as professor in Regsgeneeskunde aan die Universiteit van Kaapstad is toegewyd aandag gegee aan die sortering, ordening en klassifisering van die groot aantal nagelate gedigte, briewe, resensies en huldeblyke wat na sy dood in die media verskyn het.

Deon Knobel het sedert 2005 reeds drie publikasies oor sy broer se werk die lig laat verskyn, naamlik Twee siklusse; en skielik is dit aand, ʼn elegiese liedsiklus deur die komponis Hendrik Hofmeyr, met vyf gedigte van Wilhelm; Wilhelm Knobel die ongewapende man – van kindertyd tot sterwenstyd, ʼn vers-biografie” waarin sy lewe en werk deur middel van sy eie gedigte weergegee word. ʼn eperkte aantal kopieë van die twee boeke en ʼn D van die liedsiklus, met die komponis aan die klavier en André Howard as bariton-solis, sal na die Versindaba-aanbieding te koop aangebied word.

Daar is reeds ver gevorder met die seleksie van gedigte vir ʼn oorkoepelende Knobel-versamelbundel, sowel as die samestelling en skryf van ʼn “plakboek-biografie”. By die Versindaba-geleentheid sal Wilhelm Knobel se dokumente amptelik oorhandig word aan die Dokumentasiesentrum van die Universiteit Stellenbosch se J.S. Gericke-biblioteek.

Klik hier vir die volledige Versindaba-program. Besprekings kan gedoen word by Computicket. Kaartjies is ook by die deur te koop.

 

@ Woordfees / Versindaba 2010

 

Wilhelm Knobel

Wilhelm Knobel

 

 

 

 

 

 

 

 

 

Bookmark and Share

Comments are closed.

  •