Philip de Vos: Wanneer is ordentlik nie meer ordentlik nie?

 

ASPOESTER

Partykeer begin ek wonder.

Ek het nog altyd gereken ek is baie ordentlik wat my skryfsels betref. Stout soms, maar dit was lank gelede. Deesdae dat ek ouer is, dink ek eerder aan die kortstondigheid van alles.

Maar ongelukkig is daar een of twee of dalkies meer mense wat slegs my stoutkant raaksien. So byvoorbeeld kan ek noem wat ‘n paar tannies destyds te sê gehad het oor my strokiesteks met Piet Grobler se illustrasies wat destyds in De Kat verskyn het. Hier is hulle skrywe:

Philip de Vos en Piet Grobler se strokie oor Adam en Eva is met een woord banaal. Ek hoop soos die res van ons dat dit ‘n vroeë dood sal sterf en dat werklike spitsvondige humor sal seëvier bo vieslikheid.

S. Mostert en 10 ander, Vrouediens, Citrusdal

 

Ter selfverdediging mag ek ek seker noem dat ek in al die jare nog nooit ‘n enkele vierletterwoord in my versies of wat ookal gebruik het nie. Natuurlik ken ek al die woorde wat met P begin. En dit was ook die eerste ding wat ek gedoen het, as ek as kind deur ‘n woordeboek blaai. En as ek daardie P-woord opspoor, het dit my gewoonlik groot plesier gegee.

Dit is seker iets daarmee te doen dat ek in die laat dertigerjare, drie maande voor die uitbreek van die Tweede Wêreldoorlog gebore is. Destyds in die veertigerjare was ons almal nog baie onskuldig en baie, baie ordentlik. Lelike gedagtes is onmiddellik onderdruk en die enigste pornografie waaraan ons blootgestel is, was Koning Salomo se Hooglied.

En al het my ma my nooit van the birds and the bees vertel nie, het het ek vroeg reeds ‘n effense verdraaide weergawe daarvan in my laerskooljare verkry.

En dít is seker die rede dat ek wat my skrywe betref ‘n soort naïwiteit behou het, want ek het nog altyd gedink aan die graffiti wat ek êrens op ‘n muur gelees het:

 

I don’t care what the world knows about me, as long as my mother never finds out.

 

Wat ek dus in my vroeë versies gehad het, was ‘n tipe double entendre wat die stoutigheid aan die leser se gedagtes oorgelaat het.

Kyk maar na die volgende limericke:

 

‘n Vrou van distrik Soutpansberg

Was vreeslik verlief op ‘n dwerg.

       As dit kom by die vlees

      Was hy rêrig ‘n reus,

En sy dade was erger as erg.

 

of die volgende een:

 

‘n Kêrel van Onderstepoort

Was glad nie ‘n man van sy woord.

      Hy nooi Koeks Maree

      Vir koekies en tee,

Maar eintlik vir onderste poort.

 

In beide limericke het ek na die P-woord verwys, sonder om die ding op sy naam te noem.

Maar skielik op ‘n dag gee een van daardie P-woorde vir my probleme. Toe ek met die De Kat-strokies begin het, het ek die bekende sprokies as inspirasie gebruik en gou was dit Aspoester se beurt. Ongelukkig het daardie vrou se naam nog altyd vir sommige mense aan goeters onder die belt laat dink.

En na ‘n bietjie dink het ek ‘n 28 reëlige versie uitgedink en Piet het dit geillustreer:

 

En kort daarna verskyn die volgende brief op die De Kat se brieweblad:

 

Ek word telkemale begroet deur ‘n afskuwelike strokiesprent deur mnre. Piet Grobler en Philip de Vos. Na die walglike Aspoester-strokie kan ek dit egter nie hanteer nie. Om dus gewalg te word in dit wat ek voorheen so geniet en trots op was, is ‘n bitter pil om te sluk.

Christel Robbertze, Londen

 

Wat het ek dus uiteindelik met hierdie strokie probeer sê?  Was dit oor hoe sekere Afrikaanse woorde oor die jare hulle betekenis verander het, of was dit maar net my poging om op ‘n studentikose manier (Joan Hambidge se woord omtrent my limericke) vieslik te probeer wees.

Besluit maar self.

Bookmark and Share

10 Kommentare op “Philip de Vos: Wanneer is ordentlik nie meer ordentlik nie?”

  1. Johann :

    Ek dink nog steeds ek & jy behoort ‘n limeriekebundel vir grootmense te doen, Philip. 🙂

  2. Linda :

    Philip, sonder mense soos jy en Piet sou die lewe maar bittersaai gewees het…lief jul werk en humor…dis verkwiklik oorspronklik en hemels `vieslik`…haha.

  3. Lize Lubbe :

    Ja-nee, ons kuise voorvaders kon al die P-woorde uitdink, maar so sit ons steeds sonder ‘n bruikbare woord vir “cleavage”. Wys jou net. Jammer ek het nie vroeër van Asbokster geweet nie, ek sou my kinders soveel gespaar het.

  4. Theuns Opperman :

    Was dit Langenhoven wat gesê het dat kleinserigheid vreeslik na aan kleingeestigheid is? Ek was onlangs ongewild omdat ek op Facebook na myself as uit die oude doos verwys het!

  5. Philip de Vos :

    ‘n boodskap vir Johann – al probeer ek hóé hard, kan ek nie ‘n vierletterwoord op skrif gebruik nie. Wat ek dink, is natuurlik ‘n ander saak … Skryf jy maar solank daardie limericke en dan kan ek later (al blosend) aan jou metrum dokter.

  6. Danie Garner :

    Ek is mal oor jou limerieke, Met of sonder die P’s. Soos gewoonlik,lag ek so hard dat die bure kom hoor of ek ‘n aanval of iets erger oorgekom het!

  7. philip,
    jy is walglik!
    jou woorde gaan maar moeilik af…ek kry sommer ‘n groot knop in my keel
    francois

  8. Voorwaar n diep storie met n reuse impak.

  9. Johnnie :

    I pity your critics; their lives must be so bland!!!

  10. Damaris Loubser :

    Ag hoe lekker om dit weer te lees. Het altyd eerste daai agterbald bestudeer vir jou skrywes en Piet se bykosse. En toe dit verdwyn en jy in Die Burger opduik, het my suster elke week s’n vir my uitgeknip en gestuur waar ek ook al was, ek dink Kopenhagen en die Mermaid.

  •