Cas Vos. Lot se vrou

Lot se vrou

Na Anna Akhmatova

Gen 19:26

 

Die vroom man is op Gods engel se spoor

uitgestrek en helder teen die swart heuwel,

maar praat tog met sorg in die vrou se oor:

“Daar is tyd om nog terug te kyk, as jy wil,

na Sodom se rooi torings waar jy gebore is,

die plein waar jy gesing en geweef het,

die hoë vensters van jou donker huis,

waar jou kinders die lig gesien het.”

Sy het omgekyk en is deur pyn vergruis,

onseker of sy nog vaagweg iets kon droom,

haar liggaam het verander in deurskynende sout,

haar vlugvoete het wortel geskiet, soos ‘n boom.

‘n Verlies, maar wie rou steeds oor die lewe

van één vrou, of klaagliedere van één vrou?

Tog kan my hart nooit sonder om te bewe,

onthou hoe haar laaste asemtog verflou.

 

© Cas Vos, 2011

Bookmark and Share

Een Kommentaar op “Cas Vos. Lot se vrou”

  1. Louis Pienaar :

    Dis regtig ‘n uitstekende gedig!

  •