BY DIE TEOLOGIEKONGRES
Hoofde geboë oreer die teoloë
oor ‘n kerk en sy vergrype
toe oorloë van woorde
dekades lank die lot bepaal het
van dié wat honger na geregtigheid.
In die hoë kamers van die rede
hou draers van motgevrete togas
nou raad oor Cottlesloe en Kairos
en berou dat hul die hart vergeet het
van weerloses en armes.
Christus glimlag oor die oues se lament
naas kordate godgeleerde jong soldate
wat wil red wat daar te redde is
op ’n kongres
van bloedlose orasies.
© Zandra Bezuidenhout, 2012