Zandra Bezuidenhout. Gedig vir Woordfees 2013

WOORDFEESHEMEL 2013

 

Die Woordfees was ’n klein-klein voëltjie,

‘n fladdergiertjie in die nag;

maar dertien somers later

sprei ‘n feestelike voël

sy vlerke teen die hemel

tot elke klank en woord

’n fluit word in die feesakkoord.

 

Die maand is Maart,

die akker gooi sy poorte oop;

die kunste bied ’n toegangskaart,

laat val ‘n veer waar alles spel is

op die dorp se groot verhoog.

Die Erfurthuis staan stomverbaas:

die dans raak al hoe kwater

en die soetste bekkie water.

 

Die Woordfees word ’n fopdoskarnaval

wat jou op wolke van verbeelding

inkring tussen sterre en die kunstehemel.

Plak vas jou vlerkies, maak jou bolla los

en bring jou harp na Stellenbosch;

maak selfs die duiwel wys hy’s welkom

want die feesgeheim is samesyn.

Hemels so ‘n tyd van somerdromery

as gedagtes vrug word onder eike

in ’n suidelike paradys.

 

© Zandra Bezuidenhout

(‘n Fragment van hierdie gedig is voor in die Woordfeesbrosjure vir 2013 geplaas. )

Bookmark and Share

Comments are closed.

  •