Plekgedig 42: Mari Mocke. Hankey, hart van my jeug

Hankey, hart van my jeug

 

 

God is self die inspirasie agter Hankey…

hier in die vrugbont Gamtoos het die sendeling

met biddende Skotse aksent sy seënende

hande uitgestrek oor kloof, vallei en heuwels,

om hierdie klapsoendorpie te doop, waar Saartjie

Baartman vêrlangs familie hier het. Hy’t boere

gretig geroep om toe die geil rooi grond plegtig

te ploeg, en ons honger boesem met bloeiende

sitrus en groente te voed, waar die Kleinrivier

lag-lag vloei, waar die Waits, Scot-Youngs en Ferreiras

steeds met swetende liefde arbei om mielies,

ook melk, te voorsien… en aai, die tolofiya…

 

dié tolofiya wat my kieste laat water

is unieke godsgeskenk van dié Koikontrei…

hier waar aalwyn en protea skoon brooddronk bloei

en heuningkoek op plaasbrood paradyskos is…

hier waar ek by die Ko-op Pannas en Petrus

‘n sikspens se suiker in ‘n bruin kardoesie                                

vir hul mieliepap sien koop het, en ‘n bottel

paraffien vir hul huisie skuins teen die rantjie,

waar ou Oom Pietie Witbooi se konsertina

vrolik riel, dat selfs die waghonde antwoord gee!

 

Hankey – ousus van die Oos-Kaap waar kerkklokke

roep, en die Yellowwoods my spraakloos laat opkyk …

Dis in hierdie Hankey waarop my jeug se lei

my liefde vir die platteland gekryt sál bly …

 

 

 

Bookmark and Share

Comments are closed.

  •