Inligtingstuk
Daniel Hugo: Tuin van digters. ’n Bloemlesing uit eie werk
Daniel Hugo (1955) het die afgelope veertig jaar talle gedigte geskryf oor digters wat hom geïnspireer en geïrriteer het. Tuin van digters is ’n persoonlike keuse daaruit en kan as ’n klein literatuurgeskiedenis-in-versvorm beskou word. Die bundel bevat ’n register met die 53 digters wat daarin figureer: van Gerrit Achterberg tot George Weideman.
Hierdie bloemlesing verskyn by geleentheid van die digter se vyf-en-sestigste verjaarsdag op 26 Februarie 2020. Die foto op die voorplat is geneem deur Marlene Malan; die agterplattekening is gemaak deur André Letoit (Koos Kombuis).
Die boek sal nie in die handel beskikbaar wees nie. Die uitgewer is Christel Foord Selfpublikasies (cfoord@yebo.co.za)
Bladspieël
Vir André Letoit
in die verbygaan sien ek soms
by dié kafeetafel ’n eensame man
wat skryf – dan verbeel ek my
hy skryf oor sy weerkaatste self
die tafel en die verbyganger
wat hom verbeel: daar sit ’n man
wat oor sy eensaamheid skryf
Grapevine, Pretoria, 1978
(Die Boek Daniel, Human & Rousseau, 1986)