Bela-en-die-rus
skiet om raak te skiet, kêrels –
skiet die gepeupel uit hulle uit.
spetter die bloed
in die strate van onskuld
want strate sonder bloed
is nie interessant genoeg
vir honde aan leitoue nie.
kýk hoe ontplof hy in spatsels bloed.
dis mooi, né.
dis ʼn mooi rooi
wat ons vir nóg ses en twintig jaar
in die voetval van leiers sal aanskou.
darem kry elke hond sy dag
en basta met die res, of dan reste.
en soos die Palestynse digter sê:
ander barbare sal kom –
en tromme sal luidkeels klink
wanneer Groot Honde
– in alle wysheid – hulp verleen
en die “winde van vryheid”
vlaag op vlaag
verbykom
terwyl gemartelde lywe
in stegies wegkruip
– planne beraam –
in die steeds onderdrukte leemtes
van ook dít
waarop hierdie demokrasie geskoei is.
© Bester Meyer, 16 Augustus 2020