Die bekende digter en literatuurwetenskaplike, prof. Leon Strydom, is op 4 Januarie 2021 aan Covid-19 oorlede.
Strydom sal onthou word as hoogleraar in Literatuurwetenskap aan die UOVS. Hy publiseer twee digbundels, naamlik Geleentheidsverse en L.S., asook ‘n studie Oor die eenheid van die digbundel met verwysing na N.P. van Wyk Louw se Gestaltes en diere. ‘n Studie oor die skilder Frans Claerhout se reeks Die sonnevanger het eweneens uit sy pen verskyn.
Namens Versindaba, ons innige meegevoel aan die digter se naasbestaandes.
In 1977 het ek as komparatis saam met Leon gewerk in sy departement by die UOVS. Veral onthou ek hom vir sy humorsin (soos in die beroemde vers waarin die “windpomp” alhoe later alhoe “kwater” pomp – hy’t my eendag saamgesleep na die kommunale teekamer waar ‘n besoekende Britse wiskundige sou praat. Onvergeetlik van hoe swak die Vrystaters se beheer oor Engels indertyd was, is die ENGELSE professor aan die UOVS in 1977, wat die besoekende eminensie voorgestel het as ‘n man “who has travelled all around the bulb”…
Agterna het ons gejil van plesier oor dié uitdrukking.
Mag hy rus in vrede. Ons sal onthou. En sy “Windpomp” sal bly draai
Leon Strydom se vernuftig gestruktureerde, woordgevoelige en dikwels eienaardig kriptiese verse met hul veelvuldige betekenisse boei my.
Leon Strydom was sedert 1976 dosent in Algemene Literatuurwetenskap aan die Universiteit van die Oranje-Vrystaat en in 1978 is hy bevorder tot hoogleraar.