Kwatrynkompetisie: Kortlys

 

Die volgende kwatryne het die kortlys van die kwatrynkompetisie gehaal. Wenners sal Sondagoggend aagekondig word.

 

(5)

Luite speel luid

Los die aardse, dit tel niks, wil Bacchus maan

dans, beplan en geniet, want tyd stap aan.

Leef vrolik voluit met ‘n glasie rose;

gesondheid in die blomtyd, voor ons gaan.

(Reinet Thiart)

 

(11)

aan die voet van die Hawekwaberge

die gaste korrel nie na die Khoi-Khoi

maar aan ‘n tros van ‘n Franse druif so rooi

jy wonder wat van daardie ou herders te sê sal bly

die Hawekwa tog is deur ‘n soort plaag hier úitgegooi

(Waldemar Gouws)

 

(12)

Persië was bekend vir lekker wyn

en vir Khajjam se pittige kwatryn –

met ‘n kombinasie van dié twee

oorleef ons die knellendste kwarantyn.

(Daniel Hugo)

 

(16)

Ons taal ontstaan met wingerdsweet en wyn –

daarom dat dié woorde so maklik rym:

flink en skink, klink en drink, rinkelend en rinkink

selfs in ’n nugter Persiese kwatryn.

(Daniel Hugo)

 

(17)

Die geparste druif ken ook kwarantyn

in elke koel kelder se skemerskyn

totdat dit geskink en gedrink word

in die helder son van ons samesyn.

(Daniel Hugo)

 

(18)

met die room van die oes in ‘n glas

en ‘n bottel of ses in die kas

vergeet ons van kommer en covid

en slaan hul hand met ‘n sluk in die as

(Thomas Deacon)

 

(22)

in die wyn uit die bottel geskink, is

die boeket uit korrel en sap gegis

’n kultivar sal die aroma bydra

maar in die vate hou Covid dit gekis

(Anton Dockel)

 

(27)

Lumier

Uit elke pestilensie se puin

sal weer ‘n bloednuwe dag verskyn –

ons klink saam ‘n glas en bly verwag

uit gekneusde druif die dieper samesyn.

(Herman Wasserman)

 

(38)

God wat pandemiebekers skink,

laat soms die mens vrank druiwe drink –

onthou dan, mens, die kruis, die hisoptak,

die léwenswyn wat daarop blink.

(Marieta McGrath)

 

(41)

Nota op yskasdeur

Indien die Covid-pes my sou kom haal,

moenie stres nie – als is reeds betaal!

In my óú trousseaukis blink rosé en cabernet

in oorvloed (tjeers!) vir die begrafnisonthaal.

(Ronel de Goede)

 

(64)

Die laaste glas wyn in sy glorie

Die res mag mos nie uit die stoor nie

ons is hier gehok en  die ergste van als

is die vliegtuig kom ook nie meer oor nie.

(Cecilia Steinberg)

 

(89)

Die nadors en die babelas se piep

is beter as die pes wat diep

soos bloedwyn deur die are kruip,

wingerd- beter as virusgriep.

(Ilse van Staden)

 

(94)

Parskuipe wen

wingerde met merlot en cabernet

het meer as sewe jaar droogte gely

maar selfs ‘n onbekende sluiperpes

kon die parskuipe nie leeg laat bly

(Hannes Visser)

 

(95)

Vra vir Khajjam

vir ‘n kwatryn oor wyn gaan na o khajjam

die digter van ‘n edel persiese stam

vra hom oor die peste van sy tyd

hy sal dan verklaar wyn blus ‘n pes se vlam

(Hannes Visser)

 

(108)

Gekelderde sorge

in die Kaap by Mont du Toit se Kelder

maak pandemie se wag die smaak helder

want druiwe gis goed in boepensvate

dan word sorge vergeet en gekelder

(Anzé Bezuidenhout)

 

(109)

Wingerdbloed

daar by die Hawequaberge se voet

iewers in Wellington distrik se gloed

gemasker, gehok tydens pandemie

verander die wyn mos in wingerdbloed

Anzé Bezuidenhout)

 

(115)

Chanson

Skink woorde, lief, uit die bokaal,

dat ons mekaar besing in taal –

geïsoleer, verskans teen nood, sing

ons van laafnis, atonaal.

(Alwyn Roux)

 

(116)

Waterkrag

/xam-ka !ke-ten /ne ta, !khwa: /i: ki ta§-i  tƒwen-ta  -ku

[boesmans sê, water dra alles weg – Chrissiesmeer-batwa]

Die kersvlam druip nou klein, ontlaer en ontheem,

net die Kouwit-steenuil wat nog prewelend ween:

“dis bloed wat hierdie oord se bossie-wortels voed”.

Drink mêr-lou(w). Tale sypel weg, elke kieselsteen.

(Helize Janse van Vuuren)

 

(120)

ons weet mos nou al ons dae is soos gras

op die skaakbord staan ‘n bestemde uurglas

langs my selfoon, beursie, ‘n masker en my

doepa teen die virus, my rooiwyn paljas

(René Bohnen)

 

(123)

onder die berg en die oggendlug

lê ‘n wingerd blarerig en sug

agter glas roep my hart na ‘n dag

sonder pes en pandemie-berig

(René Bohnen)

 

(124)

Skippie in ’n bottel

Ryp druif, son, grond gevang in ’n kwatryn

korrels na pars, gis en vat gebottel as wyn.

Eindelik seil ’n klein skip agter glas

weg vir die pandemie, tydelik net skyn.

(Anton Dockel)

 

(127)

djy maak my Kôwithart so bly

met djou voel ek na vry

so sag so rooi so mooi

as djy so in my keel afgly, o Caab-er-nij

(Helize Janse van Vuuren)

 

(129)

ek skink vir jou ‘n woordkwatryn

uit Mont du Toit se bottel wyn

proe en rol dit oor jou tong

dit laat die vrees vir covid snel verdwyn

(Thomas Deacon)

 

(130)

Ek gun jou die vryheid van samesyn.

Ek gun jou vriende met goeie wyn.

Mag geen pes of pandemie ooit

jou vertroue in hoop laat kwyn.

(Driekie Grobler)

 

(131)

Bruilof

Kalkoentjie trippel dwarslyf deur die wingerdbos,

trap alsó-alsó … trap die druiwetrosse mos –

dans die dans van wynlose Kana totdat Iemand

die klipkanwater van virusse verlos.

(Pirow Bekker)

 

(132)

My nooi is in ’n nartjie my ouma in sjirash

iemand, iewers skink nóg ’n glas grenache

roep cheers deur die maskers ek sit vêr van jou

Covid gee die sproeireën met sanitary handwash

(Anton Dockel)

 

(138)

’n glasie wyn en digbundel in die hand

is in sync en relevant

die COVID-verpesting ten spyt

kom kultivar én kultuur ritmies tot stand

(Elmarie van Kampen)

 

(142)

Uit die sap van ‘n goeie bottel wyn

vloei woorde van ‘n persiese kwatryn

wat kommer oor dreigende pandemies

sommer gou-gou in die niet laat verdwyn.

(Driekie Grobler)

 

(143)

Wees vrolik, wees bly

geen pandemie sal ons onder kry

want vriende en goeie wyn

sal altyd voorrang kry.

(Driekie Grobler)

 

(144)

Boeretroos sonder melk kan nog gaan

‘n pandemie vol reëls kan ek dalk verstaan

maar lewe sonder vriende en goeie wyn

het my stap van sy huppel ontdaan.

(Driekie Grobler)

 

(156)

om ‘n stilte te vind in ‘n kovidherfsverhaal

om ‘n herfslied te sing in ‘n inheemse taal

herfskwatryne met rosyne en droëwit wyne

herfswingerde word nou weereens winterkaal

(Annora Eksteen)

 

(160)

Nou, oornag, het die skimmel uit die ooste toe ook op ons

kom sit, beetgekry, besmet. Maar net soos destyds met die dons

leer keer ons en vloei die lewe weer soos goeie wyn uit elke

bottel, elke glas as ʼn wals ʼn vastrap ʼn kotiljons

(Fanie Olivier)

 

(163)

Ritueel

Skemeraande se geliefde ritueel

geskied weens die virus soms virtueel:

die skink, die klink en die fyn, fyn proe

van keurwyn – o, steeds so sensueel!

(Ronel de Goede)

 

 

Bookmark and Share

Een Kommentaar op “Kwatrynkompetisie: Kortlys”

  1. Baie dankie! Om ‘n klompie kwatryne te kon probeer skryf, was vir my werklik diep asemhaal en kognitiewe terapie (weet nou nie of dit sin maak nie – so iets), want ja, liriese lirieke en pragtige poësie kan so helend wees. Kwatryne egter is, nou ja wel, nogal ook ‘n kopkrapper vir my. Geluk aan almal! Ek klink ‘n glasie op Versindaba waar ons almal so dikwels ‘n voorsmaak kan kry van wonderlike digkuns en uitsonderlike digters.
    Gesondheid!