Hennie Nortjé. Ou boom

 

Ou boom

 

Pasop, hierdie boom is naalddraend.

‘n Arsenaal vol penne en steke.

Die skerpte van my gebladder

vul menigte met vrees, want wie is

ooit gereed vir soveel vingerprikke?

Was ek maar den, sipres of seder,

kon mense kersliggies aan my hang.

Heeljaar uitgelate feesmaal op

feesmaal in my skaduwee geniet.

Nadoods selfs ‘n bank van my maak,

om die trae dae om op te sit en rus.

Maar die nare werklikheid suis

dag en nag deur my afgematte takke.

Te veel slegte nuus dra ek aan:

Berigte oor verval, oor verlies,

oor talle sonne wat hopeloos

te vroeg moes onder gaan.

En na die aanslae van soveel

jare, staan ek hier stroef,

hoogs prikkelbaar

die ene barste en knoetse.

My stryd teen die oormaat soet

voer ek nogtans steeds verbete:

gewortel in Goodwood,

die ou dokter van diabetes.

 

© Hennie Nortjé, 2021

 

 

Bookmark and Share

Los kommentaar

 

*